Syngibjörg

Einnota, margnota og snjór

2009-11-16T21:10:00.003Z

Var að fara í gegnum jólaseríurnar mínar í dag og er hrikalega fúl yfir því að 2 seríur sem keyptar voru í fyrra skulu hafa lent í ruslinu. Minnir mann harkalega á þann einnota verkuleika sem við bjuggum við. Það var bara gert ráð fyrir því að maður henti öllu herlegheitunum eftir jólin til að geta keypt allt það nýjasta og flottasta í jóla - línunni !!!!!
Hver segir að ég vilji vera "í tísku" þegar jólin eru annars vegar, HA????

Ég vil geta tekið fram og notað það sem alltaf hefur verið notað, föndur frá í fyrra, jólakúlu frá því ég byrjaði að búa, skraut sem tilheyrir mínu lífi og þeim minningum sem það hefur skapað. Einnota...... pfffff.........

Jæja hvað segið þig annars????? gott að geta blásið stundum finnst ykkur ekki?
Slapp við svínið en fékk eitthvað annað miður skemmtilegt í staðinn og ligg því hér með einhverja lumbru sem seint ætlar að fara. Hríðskelf hérna dúðuð undir sænginni. Er alltaf svo kalt á tánum. Er ekki alveg að skilja það.
Er annars dottin aftur í prjónagírinn og ryð upp hverri flíkinni á fætur annari. Þær lenda einhverjar í jólapökkum vina og vandamann en því fylgir góð tilfinning.
Fann svo jólaskapið í dag, seríurnar skoh.......Er þó ekki farin að spila jólalögin strax en smá svona ljós hér og þar er bara til að lýsa upp myrkrið sem er farið að skella á á miðjum degi. Og það verður ennþá meira myrkur þegar enginn snjór er. Hann hefur nefnilega þann dásamlega eiginleika að lýsa upp þó sumum sé í nöp við hann. Ég hef reyndar alltaf verið mikið fyrir snjóinn og nýt þess að fara vel klædd út í smá snjókomu. Það jafnast fátt við að koma inn eftir góðan göngutúr með rauðar kinnar með ferskt loft í lungum.

Ljúfar yfir.

súrt og sætt

2009-10-09T01:00:00.002Z

Þessu dýra námi mínu fer nú senn að ljúka.
Því fylgja svona ljúfsárar tilfinningar.
Buddan og bankinn segja amen en hjartað mitt er með kvíða.
Nú er eitt skipti eftir og þá fæ ég skírteinið í hendurnar.
Þessu fylgir konsert í Jazz House in down town Köbenhavn.
Tilhlökkun verð ég að segja.
Og svo verða mamma, pabbi, krakkarnir og Hannes líka.
Hlakka til að sýna þeim umhverfið sem ég er búin að lifa og hrærast í sl. 3 ár.
Skrítið hvað allt á sér sinn tíma í lífinu.
Maður talar um það í tímabilum, samlhiða námi , vinnu, barnsfæðingum, giftingum, skilnuðum,
vonbrigðum og nýjum vonum.
Eiginlega dáldið merkilegt.
Og svo er maður alltaf að kynnast nýju fólki.
Og það finnst mér skemmtilegast af öllu.
Hef kynnst mígrút af fólki í gegnum námið.
Alls konar fólki frá mismunandi löndum.
Og Finnarnir komu mest á óvart.
Eiginlega skemmtilega á óvart.
Ný kynslóð það á ferð??????

Lagið hennar Gabriellu

2009-09-22T17:02:00.002Z

Sáuð þið myndina á rúv á sunnudagskvöldið??
Ef ekki þá skuluð þið verða ykkur út um hana.
Ég grét, ég hló, ég var með munninn opinn og uppglennt augun, ég fékk hroll og fann tárin á kinninni streyma niður.
Sko, ég er yfirleytt ekkert svona viðkvæm en þessi mynd er sú allra fallegasta sem ég hef lengi séð. Og Gabrielas song sem er sungið í myndinni á hug minn allan þessa dagana.
Farið hingað og hlustið.
Það er einhvernveginn svo dásamlegt þegar framleiddar eru myndir um manneskjur og þá raunverulegar manneskjur, ástina og lífið. Því öll jú þráum við að verða hamingjusöm ekki satt, en margir fara fjallabaksleiðina að því og það þekki ég sjálf.
Lagið í myndinni heyrði ég fyrst fyrir 2ur árum þegar skólasystir mín í CVI söng það í tíma. Við sátum öll sem steinrunnin því við vorum m.a. að vinna með túlkun á textum og lagið syngur hún Gabriella sem er beitt miklu ofbeldi af hálfu mannsins sín og allir vissu það en enginn sagði neitt. Þekkjum við ekki svoleiðis allt of vel???
En það dásamlega við þetta allt saman er að þegar maður ákveður að fara standa allir með manni og slá skjaldborg utan um mann.
Maður viðurkennir ástandið og gefur sig á vald þeirra sem hjálpa.
Það er mikill kærleikur.

mmmmm..... ég elska Bingókúlur

2009-09-20T19:21:00.002Z

Með kjaftinn fullann af bingókúlum sit ég hér á Skógarbrautinni og blogga!!!!!
Fékk saknaðarkvart og ákvað að henda inn einni færslu EN.... ég lofa engu um framhlaldið!!!!

Það hefur eins og gefur að skilja ýmislegt á dagana drifið síðan síðast og væri það að æra óstöðugan að fara að telja það allt upp. En góðu fréttirnar eru þær að ég hef það eins og blóm í eggi, er í mínu 5 mánaða námsleyfi og sit niðri í Háskólasetri á morgnana og stúdera söngtækni og kennslu. Það fer að styttast í útskrift hjá kellunni og er það bæði svona vont og gott. Buddan er farið að kvarta sáran yfir öllum krónunum sem fara í að kaupa mat á danskri grundu og þarf ég að kafa djúpt þessa dagana til að skrapa saman nokkrum aurum fyrir ferðirnar. Það sá náttúrlulega enginn maður þetta fyrir og ég kát og glöð gat keypt mér far með Express á rúmar 20.000 og verslað í H&M á hele familien. Núna - herregud- lokar maður augunum áður en síðan hjá Express poppar upp á skjáinn og svo kíkir maður ofurhægt á milli fingranna og til að draga úr sjokkinu sem maður verður fyrir þegar bláköld talan stendur þarna fyrir framan mann. Svo fer maður í súperbrusen og kaupir sér mat og eldar til að taka með sér nesti í skólann-gúddbæ veitingahús pa Kultorvet:-(
En ég á eftir að sakna Kaupmannahafnar, hef verið mikill aðdáandi hennar undanfarið og vona að allt það góða fólk sem ég hef kynnst sl. 3 ár verði þarna þegar ég hef svo loksins efni á að ferðast til borgarinnar sem enginn veit hvenær verður.
Og auðvita hefur hrunið komið hingað á Skógarbrautina. Greiðsluþjónustan hefur hækkað um 40.000. á þessu tímabili og þarf nú að sýna hagsýni og spekúlera út hvern mánuð fyrir sig.
Byrjaði því að prjóna í gríð og erg í sumar og hef framleitt 3 peysur og nokkra vettlinga ásamt sjali svona á milli þess sem ég hjóla, gef grislíngum að borða og kyssi kallinn.
Mamma tók til í einum skápnum hjá sér í haust og ég græddi ógrynnin öll af garni svo verkefnin hrannast upp og jólagjafir fara að líta dagsins ljós svona með haustinu.
Mömmuhjartað var dálítið svona órólegt í haust en hefur jafnað sig að mestu því ekki nóg með að rokkarinn hafi farið aftur suður í MH heldur flutti söngdívan til Berlínar í framhaldsnám og er að fóta sig áfram í hinum stóra heimi. Maður ber þá von í brjósti að það sem maður nestaði þau með í gegnum uppeldið gagnist þeim nú.
Jæja, bingókúlurnar eru búnar svo ætli ég segi þetta ekki gott í bili.

Ljúfar yfir.

ljósblátt - dökkblátt og allt þar á milli

2009-05-05T14:34:00.002Z

Stundum finnst mér ég vera alger væluskjóða. Eða bara svona blá.
Það hefur einhvernveginn ágerst eftir því sem árin bætast á mig.
Stundum þaf ég ekki nema heyra eitthvað asnalegt ástarlag í útvarpinu og þá búmm...... tárin byrja að trilla. Veit ekki hvort mér á að finnast þetta asnalegt og pínlegt eða bara yppa öxlum og láta sem þetta sé eðlilegasti hlutu í heimi. Fót t.d. að grenja í dag í tíma. Við vorum að vinna með túlkun og kafa í textana sem við syngjum, finna söguna á bak við orðin, búa til karaktera og aðstæður. Hér er textinn sem fékk tárin til að trilla. Fyrst fórum við í söguna á bak við orðin, svo flutti hún hann eins og dialog og svo söng hún. Þetta jazz/blues lag er eftir Shirley Horn og er á Youtube.

Where do you start.

How do you separate the present from the past.

How do you deal with all the thing you thought would last.

That didn't last.

With bits of memories scattered here and there

I look around and don't know where to start.

Which books are yours.

Which tapes & dreams belong to you & which are mine.

Our lives are tangled like the branches of a vine.

That intertwine.

So many habits that we'll have to break.

And yesterdays we'll have to take apart

One day there'll be a song or something

in the air again.

To catch me by surprise & you'll be there again

a moment in what might have been.

Where do you start.

Do you allow yourself a little time to cry.

Or do you close your eyes & kiss it all goodbye.

I guess you try.

And though I don't know where & don't know when

I'll find myself in love again

I promise there will always be

A little place no one will see

A tiny part within my heart

That stays in love

With you

Það kom að því að konan kom sér að því að henda inn færslu.

2009-05-03T16:28:00.002Z

Er stödd í kóngsins Köben. Hér er vorið komið og kirsuberjatréð í garðinum hjá Óla frænda og Írisi í fullum blóma. Fór niður í bæ í dag og hitti góðar vinkonur, fékk mér hvítvín og sat úti í notalegu veðri. Var samt ekki viss þegar ég kom hingað hvar ég var stödd því ég heyrði bara sænsku í kringum mig bæði á flugvellinum og í lestinni. Þá er það víst þannig að Svíarnir koma hingað mikið um hlegar til að lyfta sér upp því bjórinn ku vera ódýrari í Danaveldi en hjá þeim í Svíþjóð. Og þar sem veðrið er eins og gerist best á vorin þá er fólk að spóka sig í pilsum, kvartbuxum, stuttermabolum og opnum skóm. Varð samt vitni að því að þegar maður tekur tásurnar úr sokkunum eftir veturinn þá eru þær hjá flestum illa til farnar, óklipptar og krækklóttar. Ojj... finnst nú alveg að ef maður ætlar að vera í opnum skóm að maður hafi nú fyrir því að bregða naglaklippunum á neglurnar. Ekki spillir svo fyrir ef sett er huggulegt naglalakk líka þó ég geri nú ekki beinlínis kröfu til þess.
Annars er lífið gott. Veturinn hefur að vísu verið erfiður og ýmislegt komið upp á en þegar vorar og snjórinn fer að bráðna þá getur maður ekki annað gert en að verða bjarsýnn og ekki spillir ef yndislegur maður og date fylgir með. Hjólið mitt er komið í notkun og nýt ég þess að þeysa um á því í fallega firðinum mínum og finna ilminn og vindinn leika um hárið. Sumarið verður fullt af skemmtilegheitum, ferðalögum, kóramóti og svona hangsi heima í garði með hvítvín og fullt af grillmat svei mér þá ekki bara.
Fékk bréf um daginn þar sem samþykkt var að veita mér 5 mánaða námsleyfi frá ágúst til desember. Það gefur mér tækifæri á að ljúka náminu hér í Danmörku með reisn ásamt því að geta sinnt þýðingum á námsbókum, námsefnagerð og svona bara að fá smá pásu frá kennslu. Mér til undrunar komst ég nefnilega að því í umsóknarferlinu að ég er búin að kenna í 22 ár, barasta!! Svona er lífið, stöðugt að koma manni á óvart.
Sendi svo bara ljúfar yfir til ykkar bloggvinir góðir og vona að vorið hitti ykkur eins vel og það hittir mig.

smá hérna

2009-03-20T19:57:00.002Z

Það verður að segjast eins og er að það er ákaflega dauft yfir þessari bloggsíðu minni.
Hef eitthvað misst tjáningaþörfina held ég, yfirhöfuð hreinlega, svei mér þá.
Ég ætla nú samt að reyna að halda þessu eitthvað áfram í þeirri von að þörfin kvikni aftur.
Má vera að það gerist með hækkandi sól en því er logið að mér þessa dagana að vorið sé að koma. Finn ekkert fyrir því, sé bara snjó og klæði mig í svört og hlý föt.

Sendi samt ljúfar yfir.

Gort

2009-03-08T11:47:00.002Z

Jæja ætli maður verði nú ekki að monta sig smá.
Frumburðinn er á blússandi siglingu.
Sólrisuhátíð Menntaskólans stendur yfir núna. Þar er ýmislegt menningartengt efni í boði. Hér má lesa dóma sem leikfélagið í MÍ fékk fyrir Draum á Jónsmessunótt og þar er hann í hlutverki Lísanders. Í gærkveldi var svo undankeppni fyrir söngvalkeppni framhaldsskólanna.
Hann og Halldór Smára vinur hans gerði sér lítið fyrir og unnu með laginu Kósýkvöld emð Baggalúti. Þetta var svona eiginlega grín að þeirra hálfu. Stóðu í náttsloppum og náttbuxum upp á sviði höfði borð með kexi, ostum freyðivíni og vindlum og drógu þetta upp á viðeigandi stöðum í laginu. Þetta vakti kátínu en það sem dómnefndinni fannst flottast var hvað þeir sungu þetta vel og voru svo hreinir í raddsetningunni.
Mamman hefur mestar áhyggjur af því að hann komist ekki yfir þetta allt því hann er líka í ræðuliði skólans sem komst í 4ra liða úrslit um daginn.
En það er svo merkilegt að það eru alltaf krakkarnir sem hafa mest að gera sem gengur best.

Annars er ég komin aftur heim og sit hér í stofunni minni og horfi á snjóinn feykjast fyrir utan gluggan hjá mér. Ekki hundi út sigandi og því er ég að koma mér fyrir undir teppi hér í sófanum og ætla að halda áfram að lesa Skugga vindsins. Dásamleg bók. Mæli með henni.

Sendi ljúfar yfir.

Kaffiboð

2009-02-28T00:43:00.003Z

Væri ekki notalegt að hittat eftir söngin á Austurvelli á morgun yfir einum kaffi/kakó/te bolla??
Hvað segið þið kæru bloggvinir, brilljant hugmynd ekki satt??
Konan í bænum og allt það.........
Allavega, ég ætla að setjast inn á Mokka og ég vona að þið komið og setjist hjá mér.
Hlakka til að sjá ykkur.

ÓP

2009-02-26T08:56:00.004Z

Nú langar mig að standa upp á háum hól og reka upp óp.
Ég kláraði verkefnið og prófspurningarnar fyrir skólann í Köben og sendi þær með tölvupósti áðan. Hef vakað langt fram á nætur við að svara,lesa og stúdera.
Er orðin doltið lúin. Því hér eru líka 3 stykki krakkaormar sem þurfa sitt.
Kvarta samt ekki, þetta þarfnast bara smá skipulagningar.
Fer suður á morgun og út á sunnudaginn.

En í morgun var ég að hlusta á útvarpið og þar var formaður viðskiptanefndar Álfheiður Ingadóttir í viðtali út af frumvarpinu um Seðlabankann. Og aldrei, ALDREI, kom fram í umræðunni að seðlabankastjóri gæti verið kona. Bæði hún og fréttamaðurinn töluðu alltaf um hann og var skýrt að þau voru að tala um karlmann.
Mér finnst þetta sorglegt og það er á 2009.
Þetta kallar alveg á eitt óp sem mætti taka svona með hinu ópinu.
Einhver með???

Blússandi menning

2009-02-21T20:04:00.002Z

Ég er alltaf janhissa á því sprúðlandi menningarlífi sem ríkir hér fyrir vestan
Litli Leikklúbburinn setti upp leik og söngdagsrá með lögum Jónasar og Jóns Múla; Við heimtum aukavinnu fyrir 2 vikum síðan.
Uppselt hefur verið á allar sýningar til þessa og í dag var aukasýning. Foreldrar mínir gerðu sér litið fyrir og buðu barnabörnunum með sér á sýninguna í dag. Allir glaðir og raulandi lagstúfa eins og þá stundi Mundi og bíum bíum bambaló þegar þau komu heim. Ég sá þessa sýningu um daginn og var mjög hrifin einkum vegna þess að tempóið er svo flott. Á sviðinu eru 4 hljóðfæraleikarar og ein söngkona sem syngur stundum með leikurunum og stundum ein. Hraðaval á lögunum var alveg frábært og það skapaðist mikil stemmning á sýningunni. Texta í viðlögunum er varpað upp á skjá og áhorfendur eru hvattir til að taka undir sem þeir gerðu svo sannarlega. Til hamingju LL með þessa frábæru sýningu.

Í dag hentist ég út í bíl eftir að hafa sungið í jarðarför til að komast á tónleika í Hömrum sem byrjuðu um leið og jarðarförin endaði. Vill til að hér eru vegalengdir stuttar og engin umferðarljós. Þar var ítalskur píanóleikari að spila verk eftir Scumann, Granados og Prokofief.
Tónleikarnir voru flottir í alla staði. Falleg túlkun og ásláttur áttu þar stóran hlut að máli.
Ég hlustaði á hann kenna nokkrum nemendum Tónlístarskóla Ísafjarðar í gær og fékk mörgum sinnum dejavu. Hann var svo líkur honum Halldóri Haralds gamla píanó kennararnum mínum hvað kennsluaðferð varðaði, nálgun í túlkun og tæknivinnu. Ég fór alveg mörg ár aftur í tímann þar sem ég sat í salnum í Tónó.
Í kvöld verður svo spilakvöld.
Allt að gerast.

Sendi ljúfar yfir

Sjaldan fellur eplið.......

2009-02-19T00:10:00.004Z

....................langt frá eikinni þegar ég og dóttir mín eigum í hlut.
Hún fór á skíði á laugardaginn og lenti í röð atvika í lyftunni - svona dómínó effekt- þegar ungur drengur kom rennandi á bakinu niður eftir brekkunni þar sem lyftan er. Stelpan fyrir framan Brynju sleppir stönginni og það vill ekki betur til en hún dettur og byrjar að renna í áttina að Brynju sem reyndi að sveigja frá en stúlkan kom á fleygi ferð og klessti beint á hana. Hún datt og einhvernvegin bögglaðist hendin undir hana. Við skoðun kom í ljós að bein í framhandlegg sem heitir Ölna var brotið. Núhhhh ja hér...stundi ég, almættið ekki að standa sig þessa dagana. Jæja hvað gerir maður, reynir að taka brosandi á móti þessu verkefni og leysir það eins vel og hægt er.
Hún þarf að vera 2 vikur í gifsi og verður vonandi fljót að jafna sig, fljótari en ég skulum við vona.
Það gengur nú svo- na.... með mína hendi. Verstir eru verkirnir og svo þreytist ég mjög fljótt í hinu daglega amstri. Hreyfigetan er orðin meiri en þetta er óttalega hvimleitt og þreytandi ástand.

Ljúfar yfir.

Norbusang

2009-02-08T10:36:00.003Z

Er búin að sitja á fundi síðan í gær um kóramál á norðurlöndum, kóramót, ráðstefnur og hátíðir.
Þarf að sperra eyrun allverulega því hér tala allir á sínu móðurmáli nema ég. Hér eru syngjandi norðmenn, sænsku mælandi finnar sem tala sænsku með hörðum framburði, finnar sem tala ennþá skrýtnari sænsku, elskulegir svíar og danir sem reyna að tala hægt. Hef þó náð að halda þræðinum er verð að bregða fyrir mig enskunni þegar ég tala. Finnst það eiginlega hálf skítt að hafa ekki fengið neina þjálfun í að tala helv.....dönskuna fyrst maður er nauðbeygður að læra hana í öll þessi ár. Virkar mjög absúrd þegar á hólminn er komið.

Helsingör er lítill og krúttlegur bær en enn sem komið er hef ég bara séð lestarstöðina og litla hótelið sem við gistum á. Ætla að fara eftir hádegi hér út fyrir og skoða mig um því ég á ekki flug heim fyrr en í kvöld. Mér var sagt að kastalinn sem Hamlett hans Shakespear var í sé hér. Langar að tékka á því.
Við förum einnig í kirkjuna eftir hádegi til að hlýða á drengjakór sem þar starfar.
Svo það er nóg prógramm í gangi svo hausinnn er fullur af hugmyndum og hrikalegu kvefi.
Mjög góða blanda skal ég segja ykkur

bara svona ósköp venjulegt og eiginlega ekkert merkilegt

2009-02-05T09:19:00.002Z

Er voðalega andlaus þessa dagana.
Alltaf þegar ég sest niður til að skrifa kemur ekki neitt.
Lífið er bara í sínum vanalega gír og dagarnir líða hjá.
Maður gæti alveg skrifað um pólitíkina og þjóðmálin
en ég tók þá ákvörðun að mitt blogg skuli ekki vera á slíkum nótum.
Það eru aðrir betur til þess fallnir að fjalla um slíkt.

Ég er að undirbúa mig fyrir fyrsta fundinn minn í norrænu kórasamtökunum, Norbusang.
Flýg út til Köben á laugardaginn en fundurinn er að þessu sinni haldinn þar.
Flýg svo aftur heim á sunnudaginn og hingað vestur á mánudagsmorgni.
Í vor verður haldið kóramót í Jakobstad í Finnlandi á vegum samtakanna en mótin eru haldin hvert ár og skiptast löndin á að halda þau. Tvisvar hafa slík mót verið haldin hér á landi og tekist með miklum ágætum.
Ég hafði planað að fara með Stúlknakórinn minn til Finnlands í vor en vegna ástandsins hér í efnahagslífinu var hætt við. Það halda allir að sér höndum og erfitt að fá fyrirtæki til að styrkja nokkurn skapaðan hlut. Við sáum því fram á rýra fjáröflun og ekki er heldur hægt að seilast í vasa foreldranna.
Í staðin stefnum við á kóramót sem haldið verður í Seljaskóla í apríl á vegum Tónmenntakennarafélagsins. Fannst ósköp gott að hafa þann möguleika fyrir kórinn þó það komi aldrei í staðinn fyrir utanlandsferð.
Já ástandið kemur víða við.

Morfis

2009-02-01T22:07:00.002Z

Þeir unnu drengirnir með yfir 300 stiga mun. Minn lenti í öðru sæti sem ræðumaður kvöldsins.
Var hrikalega stolt mamma í gyltum kjól því ég fór af Gala - Sólarballinu og hlustaði á fyrri hlutann. Þeir voru svo öruggir og kunnnu ræðurnar sínar hundrað prósent utanbókar. Svo voru þeir svo flottir í jakkafötum með slaufu og bindi. Þeir fengu mikinn stuðning frá skólafélugunum sem mættu með trommur og lúðra.
Svo verður dregið á miðvikudaginn um næstu mótherja.

bömmer

2009-01-31T13:17:00.002Z

Er alveg búin eftir þetta afmæli, 18 fjörugir krakkar fylltu húsið og það var aldrei þögn í þessa 3 tíma sem afmælið stóð yfir.

Vaknaði rám og þung í hausnum sem er ekki alveg nógu gott því Sólarballið er í kvöld og ég búin að fá lánaðan kjól og alles.
Neyðarplanið fer því í gang því ekki ætla ég að sitja heima.
Ó,nei.

Brynja Sólrún

2009-01-30T10:08:00.003Z

Fallega stúlkan mín er 12 ára í dag.

Hún lét bíða eftir sér í heila viku.

Svo kom hún ljúflega í heiminn í kringum sólardaginn

og amma fylgdist með.

Hún dansar ballett, spilar á píanó, syngur í kór

og sparkar bolta.

Hennar aðaláhugamál eru föt.

Þreytist aldrei á að skoða og máta.

Í kvöld verður veisla og hún bauð 20 krökkum.

Líka strákum.

Maður fullorðnast fyrr en varir.

Frumburðurinn spreytir sig

2009-01-27T22:04:00.002Z

Menntaskólinn á Ísafirði.
bb.is 27.01.2009 15:26

MÍ mætir Fjölbrautaskóla SnæfellingaMenntaskólinn á Ísafirði mætir Fjölbrautaskóla Snæfellinga í átta liða úrslitum Morfís, mælsku- og rökræðukeppni framhaldsskólanna. Viðureignin fer fram á sal Menntaskólans á Ísafirði kl. 20:30 á laugardag og er umræðuefnið „Á að leggja niður internetið?“ FSN mælir með umræðuefninu en MÍ á móti. Lið MÍ skipa Gunnar Atli Gunnarsson, Daði Már Guðmundarson, Hjalti Már Magnússon og Gunnlaugur Gunnlaugsson.

Gullkorn

2009-01-27T21:05:00.002Z

Hann sonur minn, þessi 7 ára, kom hlaupandi til mín með uppglenntann munninn og benti á tennurnar sínar.
Sagði svo ákafur; mamma mamma sjáðu tennurnar í mér, ég þarf að fá teina ég er með svo mikinn frekjuskap!!!!!

Hendin mín fína

2009-01-27T09:24:00.003Z

Nú er vika liðin síðan ég losnaði við gifsið.
Hendin er rýr, aum og stirð.
Allir snúningar og hreyfingar eru takmarkaðar.
Olnboginn skýst út þegar ég legg hendina niður með flatan lófa.
Hitti sjúkraþjálfara sem teygir og togar.
Fer líka í vax sem er yndislegt.
Vaxið er sjóðandi heitt, mýkir og er verkjastillandi.
Ár sagði læknirinn, en þú færð næstum því eins góða hendi.
Svoleiðis er nú það bara.

2009-01-25T21:52:00.002Z

Mikil elja er þetta hjá blessuðu fólkinu.
Treður marvaðann í gríð og erg.
Ætli það fái ekki bráðum sinadrátt?
Það hlýtur a.m.k. að súpa hveljur í þessum ólgusjó.

2009-01-24T20:56:00.001Z

Söng Öxar við ána við mótmælin á Silfurtorgi í dag.

Leið betur í hjartanu á eftir.

Skrítnir tímar.

ég sendi héðan......

2009-01-21T17:49:00.004Z

..........eins mikinn hávaða og hægt er að framleiða með pottum og sleifum ásamt vænum skammti af góðu öskri.

Látið vinsamlegast berast niður á Austurvöll.

hversu seinheppin er hægt að vera???

2009-01-19T22:22:00.002Z

Síðast liðinn laugardag eftir að hafa sett inn færlsu um ófærð fóru ævintýralegir atburðir í gang.
Vegagerðin sagði Steingrímsfjarðarheiðina ófæra svo ég sat hér í öngum mínum því ég átti flug út til Köben daginn eftir. Sem ég sit hér og velti málunum fyrir mér hringir mágkona mín í mig og segist vera á leiðinni að sækja mig. Hún var að fara á sýningu á keramík og vildi endilega fá mig með. Á leiðinni niður í bæ keyrum við fram á eina matarklúbbsvinkonu, og bjóðum henni far. Hún bíður okkur heim til sín í kaffi og nýbakaða súkkulaðiköku, en hún hafði hitt hinar tvær matarklúbbskonur á mótmælunum og voru þær sem sagt á leiðinni heim til hennar líka.
Við vorum rétt komnar inn og aðeins búnar að fá súkkulaðikökuilminn í nefið þegar síminn hjá henni hringir. Á línunni er sonur hennar að láta vita að hann sé lagður af stað vestur. Ég rýk upp til handa og fóta og hvái og segi að það geti ekki verið að það sé fært, vegagerðin tjáði mér að heiðin væri ófær einum og hálfum tíma áður. Ég hringi og þá eru þeir barasta byrjaðir að moka því veðrið hafði gengið niður. Sonur minn var ræstur hið snarasta að koma sækja mig og á meðan ég beið hringdi ég í ferðalang sem hafði gefið sig á tal við mig inn á flugvelli þegar hann heyrði að ég ætlaði að keyra. Hann var staddur út í Bolungarvík en vildi gjarnan fá far því hann var líka á leið til útlanda.
Heima var allt klárt, taska og bakpoki. Ég bið soninn og hans vin sem var í heimsókn um að setja "þessa tösku" og "þennan bakpoka" í bílinn. Af stað bruna ég, fyrst niður í bæ að taka bensín og henda drengjunum út í sjoppunni. Þeir ætluðu að ná sér í mynd og ég átti svo að taka þá í baka leiðinni og setja þá út hér heima. Ég fer inn á flugvöll til að ná í ferðalanginn en hann hafði skilið farangurinn sinn eftir þar og keyri af stað. Þegar ég var búin að keyra í ca.10 mín hringir síminn.
Þar er sonurinn nett pirraður og spyr hvort ég sé ekki að koma. Vaaaaáá´hhh.....í öllum flýtinum gleymdi ég drengjunum í sjoppunni og þeir búnir að flýta sér "geðveikt mikið mamma" !!!!!!
Hann var sko ekki ánægður.
Ég tók ekki í mál að snúa við og bað þá um að redda sér fari heim, hringdu í afa hann er örugglega til í að sækja ykkur:O)
Við tók 7 tíma keyrsla í mikilli hálku og myrkri. Á sumrin tekur milli 5 og 6 tíma að fara hér á milli en það er ekki hægt að keyra sömu leið á veturna því það er ekki til peningur til að moka vegina fyrir okkur eymingjana sem kjósum að búa annarsstaðar en á höfuðborgarsvæðinu.
Eftir að hafa skilað ferðalangnum til síns heima fór ég til vinkonu minnar í hlíðunum þar sem ég gisti. Þegar ég er að tæma bílinn finn ég ekki bakpokann. Í samtali við soninn kemur það í ljós að af einhverjum undarlegum ástæðum tókst þeim að klúðra því að setja þessar tvær töskur í bílinn.
Eftir að hafa sagt nokkur vel valin orð lagði ég á og reyndi að róa mig. Í bakpokanum var nefnilega tölvan, námsbækur, nótnabækur, passinn, ipodinn, myndavélin og hleðslutækið fyrir símann.
Daginn eftir var ég búin að hugsa út plan, plan sem átti að geta gengið upp.Mamma var fengin til að koma bakpokanum á einhvern sem var á leið suður með fyrstu vél á sunnudaginn, stjúpdóttirin átti að sækja hann út á Reykjavíkurflugvöll og ég ætlaði að taka rútuna suður í Keflavík og vera búin að innrita mig þegar hún kæmi með pokann til mín. Vélin fór 15.30 svo þetta átti að takast.
Ekki flogið sagði mamma svo í símtali nr xxxxxx.............
Þetta var nú bara ekki að gerast, fjandakornið.
Ég talaði við afskaplega elskulega konu hjá Express og útskýrði raunir mínar. Hún vildi allt fyrir mig gera en eftir 11. sept væri ekki lengur hægt að ferja töskur án farþega.
Með þessar upplýsingar fór ég í flug og hugðist reyna að finna leiðir næsta dag.
Skólinn minn er einn sá besti sem um getur þegar kemur að mannlegum samskiptum. Ég átti að fara í próf og þar sem ég get ekki skrifað út af hendinni ætlaði ég að nota tölvuna mína. Ég rek allar þessar raunir fyrir þeim og úr varð að ég fengi að taka prófið í næstu lotu því þeim fannst nú bara alveg nóg að ég hefði lagt það á mig að koma svona handleggsbrotin og keyrt í 7 tíma í þokkabót.
Við létum athuga hvað það myndi kosta að senda bakpokann með TNT. Heilar 25.000 kæru vinir!!!! Neehh.. frekar verð ég tölvulaus í viku en borga þessa svimandi háu upphæð.
Og þannig leið mín tölvulausa vika í útlöndum. Á fimmtudeginum var síminn orðinn batteríislaus, en ég hafði bara kveikt á honum á kvöldin áður en ég fór að sofa en hafði annars slökkt svona í viðleitni minni að drýgja orkuna.
Fyrsta daginn var ég hálf munaðarlaus en svo ákvað ég að taka þessu sem kærkomnu fríi frá þessum agalega tímaþjófi. Ég sat því eins og prinsessa í tímum á meðan skólasystir mín tók niður glósur fyrir mig.
Heimferðin núna á laugardaginn gekk vel nema það var glerhált alla leiðina og þá er ég að tala um GLERHÁLKU. En maður minn hvað veðrið var fallegt.
Datt inn um klukkan 3, hentist í sturtu því 3ur tímum seinna fylltist húsið mitt af söngelskum konum úr kórnum mínum. Við vorum með aðalfund, súpu og önnur skemmtilegheit.
Einhvernvegin er ég viss um að eitthvað hefur verið sett út í glasið mitt á Edinborg seinna um kvöldið því manni á ekki að líða eins og dauðadrukknum sjóara eftir 2 rauðvínsglös og eitt glas af baccardi razz???
Vááá.......ég er enn að reyna að átta mig á þessu.
Þessu öllu saman.

vesenvesenvesen

2009-01-10T15:25:00.002Z

Mhuuuuu..............

ekkert flug í dag..........engin kaffihúsaferð.

ferlega fúlt.........

OG....það á að fljúga

2009-01-10T10:40:00.003Z

Sit hér enn heima á Skógarbrautinni því það byrjaði að snjóa þegar ég mætti á flugvöllinn í gær.

Er búin að fá 3 sms frá flugfélaginu núna í morgun.
Það fyrsta með upplýsingum um að mæta 10.45.
Ég hentist undir sturtuna með bros á vör.
Þegar ég komu úr henni var komið sms nr.2.
Athugun 10.40.
Jæja, best að fá sér morgunmat og bíða.
Og stuttu seinna kom sms nr. 3.
Mæting í flug 11.10.
Ja hér.

Sjáumst í dag á Te og kaffi í MogM á Laugarveginum.

Í borginni

2009-01-08T20:02:00.004Z

Kæru bloggvinir.

Þar sem ég verð í borginni um helgina datt mér í hug hvort þið sem lyst og löngun hafið væruð til í að hitta mig og drekka með mér einn kaffibolla eða svo á laugardaginn.
Ég mun planta mér á bókakaffið í Mál og Menningu á Laugarveginum um kl.16.00.(Súfistinnn að mér skilst)

Hlakka til að hitta ykkur.

Annus horribilis

2009-01-05T13:34:00.006Z

Ef ég lít til baka og skoða árið 2008 þá má segja að það hafi verið ár veikinda og vonbrigða í einkalífinu. Vinnulega er ekki hægt að kvarta um verkefnaleysi því þau voru fjölbreytt og æði mörg.

Janúar
Í byrjun árs fékk ég verkefni á vegum Sinfóníunnar, kynnti og söng á tónleikum sem hljómsveitin hélt í íþróttahúsinu okkar. Var oft stoppuð á götu og í Bónus af ungum tónleikagestum sem upplýstu mig að ég væri konan í rauðu skónum með regnhlífina sem þau hefðu séð á tónleikunum. Þetta kallaði ævinlega fram bros hjá mér. Dóttirin varð 11 ára og ýmiskonar skapgerðarbrestir hafa gert vart við sig síðan sem sennilega yfirgefa okkur ekki í bráð.
Byrjaði annað árið í skólanum út í Köben.
Það snjóaði óheyrilega mikið.

Febrúar

Veiktist og lá á spítalanum í 4 daga. Var frá vinnu í eina viku og hélt svo að minni alkunnu bjartsýni og bjánaskap að ég væri orðin hress. Gösslaðist í vinnu eins og undin ræfilstuska.
Hefði þurft að vera lengur heima og viðurkenna að ég væri bara fjári veik. Var allan febrúar að ná mér og fram í mars. Átti góða að og fékk heimsókn að sunnan frá þáverandi deiti.
Hélt ég hefði fundið hinn helminginn.
Fór í krabbameinsskoðun sem dró dilk á eftir sér.

Enn snjóaði og börnin stunduðu skíðin grimmt.

Mars

Bryjaði þennan mánuð á námsferð til Köben, fór í leikhús og árshátíð.
Fékk kjól við rauðu skóna mína og var almennt bjartsýn.
Niðurstöður úr krabbameinsskoðuninni leyddi í ljós sár en ekkert alvarlegra en það.
Fékk skipun um að koma í janúar á næsta ári.
Ferðaðist dáldið á milli Ísaf - Rek - Akey -Rek - Ísaf í ýmsum erindagjörðum.
Í þessum mánuði byrjaði tiltekt og mokstur á skít sem í mér hafði setið í 11 ár.
Það var sársaukafullt en samt svo gott.

Apríl

Var göbbuð og hljóp 1. arpíl. Nenene bú bú....................... sviminn hrjáði mig enn og aftur og ég setti aftur í 1.gír.
Matarklúbburinn hélt í mér sósjallífinu og bjargaði mér frá algerri einangrun og dauða.
Enn var ferðast á milli Ísaf - Rek - Ísaf
15. apríl markaði nýtt upphaf hjá mér; ég keypti mér mína fyrstu íþróttaskó og hóf að stunda ræktina 3x í viku undir árvökulu auga Óla sjúkraþjálfara.
Hann hélt líka mokstrinum áfram.

Mai
Enn var farið til Köben, og við heimkomuna tók við löng vinnutörn.
Lennti í aftakaveðri á leið vestur upp á Steingrímsfjarðarheiði með sprungið dekk.
Var heppin að fá hjálp en tapaði einu vetrardekki því það fauk eitthvert út í vindinn.
Það hefur ladrei komið í leitirnar og hefur sjálfsagt einhver huldukonan tekið það til hliðar.

Lauk tónleikum og prófum og hlakkaði til sumarsins.

Júní

Frumburðurinn kom til mín til sumarvinnu, skrapp samt á tónleika með Kiss út til Köben og sendi glaður heim mynd því til staðfestingar. Hann varð einnig sjálfráða.
Gekk laugaveginn með skemmtilegum hóp af fólki, og fannst ég hafa sigrað heiminn því þessi ferð var ákveðin þegar ég lá sem veikust.
Átti góða daga með börnunum og deitinu að sunnan.
Fór líka norður og heimsótti góða vini.
Sviminn bankaði aftur upp á og ég var eins og í vímu.
Meltingarfærin gerðu uppreisn og ég gekk um með þaninn kvið eins og ólétt kona.
Ég pantaði mér tíma hjá meltingarsérfræðingi og fékk tíma í lok september.

Júlí.

Fékk tíma hjá meltingarsérfræðingi í gegnum klíkuskap.
Versnaði og versnaði, drakk Aloa Vera safa, hreinsaði út og gerði allar kúnstir.
Allt kom fyrir ekki.
Var barnlaus og lifði leti lífi í borginni, leigði íbúðina mína fyrir vestan,hitti vinkonur, borðaði ótæpilega af grilluðum mat, drakk mikið rauðvín og bjó hjá deitinu.
Sérfræðingurinn lagði til að ég sniðgengi fructósa og við tók að lesa sér til um það og kanna innihaldslýsingar á matvælum sem rötuðu í innkaupakörfuna.

Ágúst.

Meltingarfærin komin í algerar ógöngur. Það var sama hvað ég gerði, ekkert dugði.

Framundan var námsferð til Köben í lok mánaðarins og svo viku sumarfrí í kjölfarið með deitinu.
Krónan hækkaði stöðugt og allt var orðið helmingi dýrara.
Þegar heim kom var farið að súrna í grautnum.
Samskiptum mínum við deitið, sem hafði verið mér góður, rann sitt skeið.
Ristillinn gekk með öfugum formerkjum og allt var komið í steik.

Keypti mér loksins nýja bíl.

September.

Varð einu ári eldri.
Fór í ristil og magaspeglun sem endaði með ósköpum.
Lenti aftur inn á spítala.
Uppgötvaðist hjá mér bakflæði og núna tek ég nexium einu sinni á dag og er með ristil og meltigarfæri sem virka og virka vel.
Frumburðurinn tók þá skemmtilegu ákvörðun að flytja til mín og hefja nám við MÍ.
Við tók að færa fólk á milli herbergja, kaupa hillur og koma sér fyrir. Hann hélt svo áfram trommunámi sínu í Tónlistarskólanum og stefnir á grunnstigið.
Tónlistardagurinn mikli gerði stormandi lukku og næsta víst að hann verði árlegur viðburður héðan í frá.
Lennti á skralli og eingaðist nýjan vin.
Vin sem býður mér í mat, kaffi og talar við mig, er skemmtilegur og sjarmerandi.
Fékk atvinnutilboð sem ég gat ekki hafnað og bætti því á mig enn einu verkefninu.

Október

Fór í 5. námsferð þessa árs til Köben. Vann mikið, stundaði ræktina sem hélt mér gangandi.
Vetur konungur hélt innreið sína og Syngibjörg naut sín í nýja bílnum.
Matarklúbburinn blómstraði og hugmyndir um námskeið og önnur skemmtilegheit litu dagsins ljós.

Nóvember

Skilaboðaskjóðan og Hárið æfð á víxl ásamt fullri kennslu og einhverskonar heimilishaldi.
Orðin súr yfir hruninu og krónunni sem kom m.a. í veg fyrir að ég komst ekki í 6. og síðustu námsferð þessa árs til Köben.
Frumsýning á Skilaboðaskjóðunni tókst með afbrigðum vel og uppselt var á allar sýningar og aukasýningar.
Lifði í einskonar móki og tók einn dag í einu til að fara ekki á límingunum vegna vinnuálags.
Frumsýndi Hárið við dúndrandi lófaklapp, flaut og húrrahróp. Þetta litla samfélag okkar á svo sannarlega flotta unglinga.
Yngsti fjölskyldumeðlimurinn varð 7 ára, og var búinn að missa báðar framtennurnar.

Desember

Jóla jóla jóla törn
Í það heila kom ég að 17 tónleikum þennan mánuð.
Eftir tónleika númer 6 var kominn tími að gera sér glaðan dag. Sá gleðilegi dagur endaði upp á spítala þar sem konan var úrskurðuð tvíhandleggsbrotin.
Hélt þó áfram að vinna og klára mína pligt en fékk þó aðstoð.
Jólaundirbúningurinn breyttist því skyndilega í hjálp í viðlögum þar sem einhenta konan átti í hlut. Matarklúbburinn sýndi snilldartakta og átti heila opnu og eina til í jólablaði BB (bæjarins besta).
Hef farið í reglulegt tékk með röntgenmyndum og umbúðaskiptum.
Allt lítur þetta vel út en svo á eftir að koma í ljós hvernig gengur að ná upp fyrri færni og styrk.
Og ég öskraði á eftir stóru rakettunni sem puðraðist upp í loftið á gamlársdag.
Í þessu öskri kristallaðist allt það sem 2008 stóð fyrir, veikindi og vonbrigði.
Og innst í hjarta mínu á ég mér ósk, ósk um að annað eins ár komi aldrei, aldrei aftur.
Og ég hef spurt , hvenær er komið nóg???????
Og svar mitt er þetta:

NÚNA ER KOMIÐ NÓG

Púmmmm.......og upp það fuðraði árið 2008

2009-01-01T14:17:00.004Z

Gleðilegt nýtt ár kæru vinir nær og fjær.

Óska ykkur gæfu á nýju ári.

Þó útlitið sé ekki bjart þá skulum við ekki gleyma að við eigum fallegt land
sem bíður upp á óendanlega möguleika.

Ný staða

2008-12-30T18:58:00.003Z

Mætti klukkan 10 í morgun á göngudeildina og hélt mig vera bara snemma í því.
Ó nei ekki alveg.
Beið í 40 mín. áður en kom að mér.
Gifsið var tekið af og við blasti ósköp ræfilsleg og þurr hendi.
Hún var í frekar fyndinni stöðu, hallaði eiginleg undir flatt.
Jæja sagði doktorinn, nú skaltu reyna bara hægt og rólega að hreyfa hana.
Ég kyngdi og horfði á hendina.
Fyrst reyndi ég að opna lófann og færa þumalinn út til hægri.
Það gekk með miklum erfiðsmunum og sársauka.
Næst var að hreyfa úlnliðinn og reyna að rétta af hendina.
Þá leið nú eiginlega hálfpartinn yfir mig.
Assgoti sem þetta var mikil pína.
"Brotið er alveg fast" heyrði ég doktorinn segja "þú finnur til afþví allt er svo stíft og fast".
Ég var nú samt látin leggjast út af og þá gekk þetta betur.
Og núna get ég notað löngutöng,vísifingur og baugfingur á lyklaborðinu.
Alger lúxuss.
Fékk að skoða myndirnar og þetta lítur líka svona ljómandi vel út.

Tékk eftir 2 vikur.

Ljúfir dagar

2008-12-26T12:47:00.002Z

Sannarlega hafa þetta verið ljúfir dagar. Ýmislegt fallegt og gagnlegt kom upp úr pökkunum.
Vænst þykir mér um það sem börnin bjuggu til.
Hlynur Ingi saumaði jólabjöllu úr flísefni með glimmeri og skreytti fallega krukku sem nota má sem kertastjaka. Brynja Sólrún saumaði púða úr flísefni og festi á hann útsaumaðan dúk, hún gaf mér líka jólabók þar sem hún hafði skrifað og myndskreytt ýmislegt tengt jólum. Upp úr pakka frá fumburðinum kom dekur, handsnyrting "sem þú átt að fara í þegar þú losnar úr þessu gifsi mamma" og kroppakrem.
Er svo að lesa Skaparann eftir Guðrúnu Evu og Húsið eftir Hörpu J ,bloggarann okkar góða svona á milli þess sem ég glápi á imbann, fæ mér lúr og borða enn meiri jólamat.

Sendi ljúfar yfir.

Jólakveðja

2008-12-23T11:28:00.003Z

Kæru bloggvinir og aðrir sem hér koma í heimsókn.

Fjölskyldan á Skógarbrautinni sendir ykkur bestu óskir

um gleðileg jól og farsælt komandi ár.

"Hittumst" heil á nýju ári.

Jólandinn fangaður

2008-12-18T13:25:00.003Z

Hér er búið að baka 2 sortir af smákökum og gera smá jólanammi.
Jólailmurinn loksins kominn í hús.
Sjúpdóttirin og aðrir fjölskyldumeðlimir hjálpuðust að.
Púrtvínið og jólabjórinn er líka ómissandi með jólasíldinni.

Hendin var stífuð enn meir í gær, þvinguð og fín en kom þó ekki í veg fyrir að ég færi í ræktina í morgun. Verð þannig í 3 vikur og þá verður hún rétt af, gifs aftur í 3 vikur og svo tekur við hálft til eitt ár í þjálfun til að ná upp fyrri færni.
Og maður bara brosir og hugsar sem svo að ég hef báða fætur og er enn með fulle femm.

Takk kæru vinir fyrir góðar kveðjur sl.vikur.

Sendi ljúfar yfir.

Fyrsta vikan liðin

2008-12-16T02:53:00.012Z

Í heimi handalausu konunnar gerist ýmislegt. Fyrir það fyrsta hefur hún þróað með sér tækni til að krækja brjósthaldaranum, þjálfað upp ógnarhraða á lyklaborðið með þeirri vinstri, uppgötvað hvað hún á yndislegan 7 ára gutta sem stekkur óbeðinn út úr bílnum til að opna hurðina fyrir móður sína og lokar henni svo á eftir henni. Að heimilismeðlimir geta gert ýmislegt þegar móðirin er tekin úr umferð og að í kringum mig er fullt af yndislegu fólki sem boðið hefur fram aðstoð sína í einni eða annari mynd. Ég fékk t.d. heimsókn í morgun og mér voru færðar smákökur í fallegu boxi. Eftirfarandi myndir lýsa kannski best hvernig síðasta vika hefur verið.

Á þessari mynd er "saving kitt" einhentu konunnar, gjöf frá matarklúbbnum, en í því

er jólablað, rauðvínsflaska, 70% súkkulaði, sérskreyttur vinstrihandar gúmmíhanski og síðast en ekku síst vinstri handar skæri.

Þó einhenta konan hafi lært ýmislegt sl. viku hefur henni ekki tekist

að læra að plokka sig svo vel sé.

Því var mín elskulega mágkona fengin í verkið.

Hún sýndi einstaklega fagmannleg handtök og laug því að

hafa aldrei gert þetta á öðrum en sjálfum sér.

Sjáið þið bara hvað ég er örugg í hennar höndum, lygni aftur augunum og allt.

Svo þarf auðvita að skoða útkomuna vel og vandlega.

Brynja Sólrún var að undirbúa sig fyrir ballettsýningu og þá þurfti að festa teygjuna á balletskónum. Hún tók því nál og tvinna og gerði þetta alveg sjálf.

Og Daði Már uppgötvaði rétt fyrir jólahlaðborð sl. laugardag

að það hafði komið saumspretta á jakkann.

Ég kenndi honum að þræða saumavélina og hann gerði við.

Og þessir blómvendir sem ég fékk eftir tónleikana sl. mánudag

hafa glatt mig og fyllt húsið blómailmi.

vesenið alltaf á mér

2008-12-11T10:29:00.002Z

Enn og aftur sannast hvað það er dýrmætt að eiga góða að. Hef fengið aðstoð úr öllum áttum og er ákaflega þakklát fyrir það. Bara það að komast í sturtu er heilmikið mál, og að reyna að mála sig með vinstri er ekki auðvelt. Maskarinn klínist út um allt. Get svo ekki einu sinni opnað kremdós.
Verkurinn er enn og það er sárt að hreyfa hendina. Verð samt að vera dugleg við það svo bólgan setjist ekki í hana. Bryð parkódín forte til að gera þetta bærilegt.
Ég fer í vinnuna í dag en verð með frábæra konu mér við hlið og ætla að reyna að vera stillt og gera sem minnst. Jólatónleikar verða í kvöld út í Bolungarvík í tónlistarskólanum þar en þá á ég eftir 2 jólatónleika hér á Ísafirði.Verð komin í frí á mánudaginn. Og auðvita langar mig að fara að jólastússast eitthvað, sjáum til hvot ég geti ekki virkjað börnin eitthvað.
Já þetta er nú ekki það sem ég hafði óskað mér, en ég bið til Guðs um að hendin, sem er mitt vinnutæki, fái fullan bata og ég geti spilað á píanóið og stjórnað kór án vankvæða.

Sendi ljúfar yfir.

Svipmyndir frá tónleikunum í gær

2008-12-09T22:06:00.011Z

Og það er við hæfi að hneigja sig í lok tónleka.

Arna Björk syngur alt aríuna

Helga Margrét og Ingunn Ósk sungu dúettinn í Ceremony

Syngibjörg og Sophie

Stúlkna og barnakórinn

Sophie hörpuleikari

Hulda meðleikari og Syngibjörg

Söngspírur í Stúlknakórnum

Drengirnir í barnakórnum, Hlynur Ingi og Hafseinn

Barnakórinn

Stúlknakórinn

Vinstri hendin í þjálfunarbúðum

2008-12-09T15:39:00.003Z

Eftir afskaplega vel heppnaða tónleika í gær var sannarlega tilefni til að skála. Við kvennakórskonur fórum á Kaffi Edinborg hlógum mikið og hátt og sungum að sjálfsögðu.
Þar sem þetta var nú bara venjulegt mánudagskvöld lokaði kaffihúsið kl.23.30 svo ein úr hópnum bauð okkur heim til sín því við vorum ekkert á því að fara alveg strax í bólið.
Það var mikið talað og ein úr hópnum vildi endilega athuga hvot ekki væri hægt að kaupa sígó hana lanaði svo mikið í eina mjóa. Rétt hjá er bílalúga sem við köllum krílið og þangað hélt hún og ég með. En við fórum algera erindisleysu því það var búið að loka sjoppunni enda klukkan að ganga tólf á miðnætti. Veðrið var stillt. mikið frost og birtan var orðin svarblá upplýst af jólaljósum sem bæjarbúar hafa verið duglegir að skreyta með. Við snérum því við frekar fúlar yfir sígarettuleysinu. Þegar við komum svo að húsinu geng ég á undan upp tröppur en þá vill ekki betur til en mér skrikar fótur og ég renn og dett. Í fallinu ber ég hægri hendina fyrir mig, hún lendir á tröppubrúninni og ég hníg emjandi niður á gangstéttina.
Ég fann að eitthvað hafði gerst og grunur minn staðfestist þegar búið var að taka myndir.
Konan braut á sér hendina. Og ekki bara á einum stað heldur á tvemur, hjá kúlunni á úlnliðnum og svo fyrir ofan liðamótin.
Höndin var öll orðin skökk svo það þurfti að toga hana til og skorða beinið rétt. Og þá söng og hvein í Syngibjörgu þrátt fyrir deyfilyf. Sit því hér og pikka þessa færslu inn með vinstri, en ég er rétthent svo þetta er ansi seinlegt skal ég segja ykkur.
Læt þetta því duga í bili.

Og enn er sungið

2008-12-07T10:04:00.003Z

Þessir tónleikar eru á morgun, allt að verða klárt og síðasta æfing í dag.

Mér sýnist að það verði flogið svo hörpuleikarinn verður kominn í hús um hádegi.

Svo er aðventukvöld í Bolungarvík kl. 20.00 þar sem litli kórinn minn úr Tónlistarskólanum þar flytur helgileik. Hólskirkja í Bolungarvík er 100 ára og búið að taka hana í gegn innan sem utan.

En þetta er ekki búið enn, jólatónleikar tónlistarskólann eru eftir en ég sé fram á að skríða heim til mín 17. desember og þá komin í frí eftir 4 vikna törn þar sem hvert einastakvöld og hver einasta helgi hefur verið undirlögð af æfingum, tónleikum, fumsýningum og öðru söngstússi ásamt fullri kennslu.

Þetta er náttúrulega bilun.

Geri mér engar vonir um jólabakstur þetta árið. Kannski piparkökur ef ég nenni og þrýstingurinn frá krökkunum verður mikill.

Verð ánægð með mig ef ég kem því í verk að skrifa og senda jólakort.

Ljúfar yfir og njótið dagsins.

Syngi - syngi

2008-12-04T10:33:00.003Z

Þá er komið að því.

Stúlknakórinn syngur aftur með Frostrósum eins og í fyrra.

Tvennir tónleikar; í dag og í kvöld.

Þessi mynd var tekin á tónleikunum í fyrra.

og liðug....

2008-12-03T00:28:00.002Z

Langar að segja svo margt en kem ekki orðum að því.

Málllaus, huglaus, vitlaus, bjargarlaus, ástlaus, laus..................

2008-11-27T12:24:00.002Z

Hann Hlynur Ingi varð loksins 7 ára í gær.

Hann var mikið búinn að bíða eftir þessum degi,

strika yfir daga á dagatali sem við útbjuggum og telja niður.

Hann hélt upp á það með strákaafmæli í gær og var mikið fjör.

Og svo sáum við glitta í eina fullorðinsframtönn.

Maður er sko orðinn stór.

2008-11-23T22:40:00.002Z

Vill ekki einhver eiga þennan pirring sem angrar mig?
Hef tamið mér bjartsýni í gegnum tíðina sem hefur hjálpað mér gríðarlega mikið,
en þessi pirringur hefur verið einum of lengi. Næ ekki að hrekja hann í burtu.
Held ég sé orðin langþreytt.
En nú reynir á skipulagshæfileikana því þéttari dagskrá hef ég varla komið mér í áður.
Og sjálfasgt hristir einhver hausinn og spyr hvenær ætlar manneskjan að læra að segja NEI.

Æfingar verða núna á hverju kvöldi því Hárið verður frumsýnt í vikulokinn.
Uppákomurnar verða æði margar í desember eins og undanfarið því allir vilja hafa falleg börn að syngja þegar kveikt er á jólatrjám, á aðventukvöldum í kirkjunum, í fjölskyldurmessum með helgileiki, á jólatónleikum og svo framvegis og svo framvegis....................................
Ofan í þetta á svo Hlynur Ingi afmæli og ekki slæ ég því á frest. Var ótrúlega forsjál í dag og bakaði fyrir afmælið og setti í frystinn. Get því töfrað fram afmælisveislu á miðvikudaginn fyrir hann og skólafélagana.
Ætla að taka einn dag í einu og reyna að vinna mig þannig í gegnum þetta.
Samt verð ég að hafa ákveðna yfirsýn og þá kemur dagatalið góða sem ég keypti í Köben í sumar að góðum notum. Því fylgdi fullt af límmiðum til að minna sig á hina og þessa viðburði og virkar fínt fyrir krakkana því það finnst þeim meira spennandi.

Jólin eru ekki komin á hreint varðandi krakkana en ég geri ráð fyrir að þau verði hjá föður sínum í þetta sinn því þau voru hjá mér í fyrra.
Á auðveldara með að hugsa til jólanna núna, sem segir mér hvað ég er komin langt í þessu ferli öllu saman.
Fyrir það er ég ákaflega þakklát og glöð.

Njótið dagsins.

Kruttlurnar

2008-11-20T08:54:00.005Z

Undanfarnar vikur hefur dóttir mín ásamt vinkonum sínum æft stíft fyrir freestyle keppni sem haldin er fyrir 6. og 7. bekk Grunnskólans hér í bæ. Þær sömdu dansinn sjálfar, alveg einar og óstuddar og lögðu mikinn metnað í allt saman. Keppnin fór fram í gær í sal skólans og tóku 6 danshópar þátt. Mömmurnar hjálpuðu svo til á síðasta sprettinum með hárið og smá gloss og málningu því "það verður að sjást framan í okkur í ljósunum, annars verðum við svo hvítar " en þannig tók dóttir mín til orða þegar ég hváði við málningahugmyndinni. Og það var alveg rétt hjá henni því þegar á hólminn var komið þá voru þær æðislegar og tóku sig til og unnu!!

Brynja Sólrún, Alexía, Emma Jóna og Elín Lóa
Eva danskennari setur verðlaunapeninginn um hálsinn á Brynju Sólrúnu

Flottar stelpur í 6. bekk

lífið er lotterí

2008-11-18T22:45:00.003Z

Síðan síðast hefur ýmislegt markvert borið á góma í mínu lífi

upplifði einangrun án netsins
nettengdist aftur og fékk líka sjónvarp síman
hvarf úr einangrun
æfði og æfði og æfði og æfði krakkana fyrir Skilaboðuskjóðuna
frumsýndi svo hana
fór á tískusýningu í góðum félagsskap
drakk líka hvítvín í þeim félagsskap
eldaði og bakaði fyrir jólamatarklúbbsveisluna sem verður svo á miðopnu bb (bæjarins besta) í jólablaði þess
fór í Dalaportskjólinn, setti á mig rauða beltið og rauðu skóna og vara alger jólastelpa
hlakka svo til að komast í smá pásu (pásan verður eftir mánuð altsvo)
ekki farið til Köben í þetta skiptið
orðið súr yfir því
og súr yfir íslenskri pólitík
glöð að fá börnin mín til mín
brosað þrátt fyrir vonbrigði
reynt að sjá alltaf það jákvæða
fengið gott knús
notið þess að vera til

Óskirnar

2008-11-12T23:32:00.003Z

Er svo óendanlega þreytt að ég er hætt að geta sofið.
Allt í rugli.
Langar í eitt stykki vetrarfrí og stað þar sem hægt er að hlaða batteríin.
Já og líka stóran, hlýjann faðm og mikið knús.

2008-11-07T18:49:00.002Z

Jæja nú hef ég ekkert net heima og því hefur lítið verið bloggað.
Er í hálfgerðu móki þessa dagana.
Finnst allt öfugsnúið og ekki rétt.
Og er sjálfsagt ekki ein um það.

Afrekaði þó að halda eina litla hádegistónleika í nýju byggingunni í Grunnskólanum.
Stjórnaði þar 30 ormum frá 2 - 5 bekk sem syngja í Barnakór Tónlistarskólans.
Afskaplega sætt og þau stóðu sig með prýði.

Helgin fer öll í vinnu og vinnu og meiri vinnu því senn líður að frumsýningu Skilaboðaskjóðunnar og Hársins.

Ljúfar yfir og njótið lífins.

heimilisiðnaðarfélagið há eff

2008-11-02T13:44:00.003Z

Við matarklúbbsvinkonurnar ætlum að kíkja í Dalaportið núna á eftir, fá okkur kaffi og með´ði.
Svo verður aldrei að vita nema maður finni einhverja jólagjöf á góður verði, ekki er ráð nema í tíma sé tekið og vissara að dreifa þeim kaupum eitthvað. Annars verða mínar gjafir sennilega meira og minna einhvern heimilisiðnaður, byrjaði m.a. á peysu handa Dívunni í þessari viku og er að nálgast handveginn. Er líka búin að taka slátur og baka til að eiga í frystinum. Hagsýnisgírinn rann á mig með látum en verst er að ég á ekki frystikistu.

Það eina sem ástandið á eftir að hafa áhrif á hjá mér er námið út í Köben, og finnst mér það súrt.
Ég á eitt ár eftir af 3ur og var heppin að vera bún að greiða skólagjöldin fyrir þetta ár áður en allt fór fjandans til. Ég á eftir að greiða fyrir næsta ár en skólagjöldin hafa hækkað um helming úr hálfri í eina millu og er það of stór biti fyrir budduna mína. Veit því ekki hvað verður en skólinn hefur lýst yfir vilja sína til að koma á móts við okkur íslendingana. Ég mun að öllum líkindum ekki fara út þennan mánuðinn sem mér finnst enn súrara.
Þetta er nú ljóta ástndið.
En nóg um það.

Hef lifað önnumkafna daga síðustu viku við æfingar á Skilaboðaskjóðunni, Hárinu og allri kennslunni. Eigum frábæran auð í unga fólkinu okkar sem geislar af hæfileikum og finnur þeim farveg í heilbrigðum tómstundum. Ef það er ekki forvörn þá má ljúga hverju sem er að mér.

Annars elska ég sunnudaga.
Ætla að njóta hans í dag.

börnin og ástandið

2008-10-31T17:20:00.001Z

BS; mamma veistu, skjár einn er að hætta á morgunn.

Big; ha nú? afhverju

BS.; jú sko , hann datt á hausinn

Eftir óveðrið

2008-10-27T22:20:00.011Z

Á sunnudaginn vöknuðu bæjarbúar í póstkorti.

Bærinn skartaði sínu fegursta í blíðunni sem loks kom eftir óveðrið.

Og það var eins og einhver hefði tekið mynd af augnablikinu og tíminn stæði í stað.

Slík var fegurðin.

Pollurinn spegilsléttur, alhvítur snjór lá yfir öllu og sólin glennti sig.

Bæjarbúar ýmist gengu á sínum eigin eða með skíðin spennt, börnin renndu sér á þotum og sleðum og allt kvikt var viðrað.

Meira að segja lítil mús sem fann sér skjól í fótspori lét ekki þennan dag fram hjá sér fara.

Skógarbúar vildu ólmir fara út að renna og eru þessar myndir teknar þegar við fórum inn á golfvöll.

Brynja Sólrún og Hlynur Ingi tilbúin í sleðaferð

Og svona leit golfvöllurinn út, margmenni á gönguskíðum.

Hlynur Ingi missti báðar framtennurnar um daginn og nýtir hvert tækifæri til að glenna "fegurðina" framan í fólk.

Brynja Sólrún ánægð í snjónum.

Og mýsla litla sem leitaði sér skjóls í fótsporinu var búin að kúka fínum músakúk og skalf svo eins og hrísla. Börnin vildu ólm hlýja henni en móðirin útskýrði að við skyldum nú láta náttúruna um sína.

Óvænt

2008-10-23T15:26:00.002Z

Fékk óvænt frí í dag. Vetur konungur stjórnaði því.
Öll börn send heim eftir skóla í dag og ég fékk fáa í tíma til mín.
Ákváðum því að fella niður kóræfingu hjá Barnakórnum.
Og svo er líka frí á æfingu á Skilaboðaskjóðunni.
Var því komin heim kl. 3 í dag í fyrsta sinn ...... já ég man eiginlega ekki síðan hvenær.
En það var búið að moka götuna hingað til mín og Ravinn er svoleiðis að standa sig.

Sit því undir teppi og horfi á veðrið út um gluggann minn og sýp á tei.
mmm.....notalegt.

Veturinn heilsar

2008-10-22T10:56:00.004Z

Vetur konungur er kominn til okkar hér fyrir vestan.

Þessa mynd tók ég í morgun af svölunum en það fer að verða

þotufært á hólnum í garðinum.

Vetrardekkin eru einnig komin undir Rav-inn og er tilfinningin óneitanlega góð

að sitja inn í honum núna þegar veturinn er að skella á okkur.

Fyrir ofan okkur hér á Skógarbrautinni má líta þennan bor.

Hér er verið að bora eftir heitu vatni en það fannst 50° heitt vatn

þarna fyri tveimur árum og var ráðist í það að bora lengra í von um að finna heitara vatn.

Ef það finnst þá væri það afskaplega mikil breyting fyrir okkur því við notum fjarvarma til að hita upp vatnið og borgum okurverð fyrir. Það var það eina neikvæða sem ég sá við það að flytja hingað fyrir rúmun 2ur árum að kyndingarkostnaður hér er fokdýr.

En það jafnast út því annað t.d bensín er ekkert í líkingu við það sem var þegar ég bjó á höfuðborgarsvaæðinu. Svo allt hefur sína kosti og galla.

Húfur og vettlingar ásamt hlýjum peysum eru nú komin í not eftir sumardvala en þar sem sumir höfðu stækkað frá því í fyrra varð að fara og endurnýja.

Held ég verði minnst fyrr en ég kæri mig um.

Börnin fá vöxtinn frá einhverjum öðrum en mér.

Er annars á leið í súpuhitting í hádeginu með góðum vinkonum

og með fylgir erindi sem ég segi seinna frá.

Sunnudagar geta verið alveg hreint yndislegir.

2008-10-19T22:18:00.004Z

Þetta hefur aldeilis verið góður dagur.
Þreif hér allt hátt og lágt í morgun , fór svo í göngutúr eftir hádegi í kuldanum uppáklædd í dúnúlpu, húfu og hlífðarbuxur. Það var einstaklega hressandi.

Sat svo í tónlistarskólanum í Bolungarvík og spilaði inn raddirnar í Ceremony of Carols á meðan Hrólfur ýtti á þar til gerða takka til að taka það upp. Svo ætlar hann að brenna þetta á disk fyrir okkur og þá verða kórarnir enga stunda að læra sínar raddir. Þetta tók mig aðeins 2 og 1/2 tíma.
Svo verður þetta dásamlega verk hans Benjamins Britten flutt í Ísafjarðarkirkju í desember af Kvennakórnum, Stúlknakórnum og einsöngvurum úr tónlistarskólanum á Ísafirði.
Einhvernvegin fæ ég aldrei nóg af þessu verki og finnst að allir ættu að kynnast því.
Þetta er tilraun af minni hálfu í þá veru.

Eftir innáspilið ók ég Óshlíðina inn á Ísafjörð (jæks, það var ekki hálka , finnst hún bara alltaf jafn skerý) og í Bónus. Keypti svona sitt lítið af hverju sem vantaði og kom því öllu í innkaupapokann sem ég á frá Tiger en borgaði samt rúmar 4 þúsund krónur fyrir. Váááa, það eru sannarlega víðsjárverðir tímar.

Eldaði svo lasagna, opnaði rauðvín og bakaði möffins.
Já og eiginlega er dagur að kveldi kominn, börnin að ljúka við tiltekt (algerlega óumbeðin!!) og frúin á leið í háttinn eða svona hvað og hverju.

Ljúfar yfir og verið spök.

snillingarnir í daglega lífinu

2008-10-14T19:40:00.003Z

Í morgunn stóð ég í ganginum í tónlistarskólanum og tók á móti 5. bekk sem kemur til mín í tónmennt einu sinni í viku. Þau þustu öll inn rjóð í vöngum eftir frímínútur. Einn dregnurinn kemur hoppandi á einum fæti og ég spyr hvað hafi komið fyrir. Jú sko ég meiddi mig á íþróttahátíðinn sagði hann. Æi það var ekki gott segi ég, en afhverju ertu ekki með hækjur ef þú mátt ekki stíga í fótinn? nú það voru svo margir búnir að meiða sig og ég var síðastur á spítalann og þá áttu þeir ekki til fleiri hækjur!!
Ég dæsi og og hef einhver orð um að það sé ekki gott að vera á einum fæti hoppandi um og sérstaklega upp allar tröppurnar og í þeim töluðu orðum sný ég mér við til að heilsa fleirum nemendum. Stendur þá fyrir framan mig bekkjarbróðir þessa slasaða og hefur eitthvað heyrt af orðaskiptum okkar því honum verður á orði; sjáðu svo mig, ég er nú bara á svona ekta íslenskum ullarsokkum, og alveg glænýjum. Það fannst honum eiginlega merkilegra.

ferðalangur komin heim

2008-10-14T08:49:00.005Z

Ísafjörður -Reykjavík

Keflavík -Kaupmannahöfn

Kaupmannahöfn - Keflavík

Reykjavík - Akureyrir

Akureyri - Aðaldalur

Aðaldalur -Akureyri

Akureyri -Reykjavík

Reykjavík -Ísafjörður

Einhvernvegin svona var ferðalagið frá 3. -12. október.

Byrjaði á því að taka tvö próf í CVI og gekk þrusuvel. Þegar heim kom hélt söngnámskeið og fyrirlestur í Aðaldalnum og fékk frábæra söngvara að vinna með. Græddi tvö afmælisboð hjá fólki sem ég reyndar þekki ekki neitt en þeir eru svo gestrisnir þarna í sveitinni. Fannst ómögulegt að gesturinn ( ég) væri skilin eftir heima hjá vinkonunni á meðan hún færi í fjörið.

Komin núna heim í rútinuna og líkar það vel. Er doldið svona rútínukelling. Veitir mér öryggi sem ég kann vel við. En ekki misskilja mig, mér finnst líka gaman að óvæntum uppákomum og ferðalögum svona inn á milli. Annars myndi maður bara deyja úr leiðindum.

Samkvæmt dagbókinni minni er ég ásamt konunum í matarklúbbnum að fara að halda námskeið í því hvernig á að elda hollan mat án mikillar fyrirhafnar. Það er á vegum Heilsueflingar, sem er félagsskapur sem hefur staðið fyrir ýmsu í sambandi við hreyfingu og heilbrigðan lífsstíl.

Á eftir að heyra í mínum konum en læt fylgja myndir sem teknar voru síðast þegar við hittumst.

afmæli, eldhnettir og krónan

2008-10-08T15:49:00.002Z

Í gær átti litla frænka afmæli og ég fékk að upplifa danska fjölskylduveislu eins og hún gerist best. Matur fyrir 18 manns með öllu tilheyrandi og dönskum afmælissöng þegar mamman kom inn í borðstofuna með köku alsetta kertaljósum og blysi. Og svona til að halda í þjóðrembinginn því stúlkan er jú hálf íslensk hóf Syngibjörg upp raust sína og söng íslenska afmælissönginn eftir Atla Heimi og Þóraninn Eldjárn. Margir bloggarar hafi fengið þannig afmæliskveðju frá mér því mér þykir þessi ameríski heldur klénn og er að reyna að breiða hinn út því það er miklu skemmtilegara að við höfum okkar eigin afmælissöng og hann er bara nokkuð góður hjá honum Atla Heimi. Ekki flókinn og er auðveldur að muna. Það var farið frekar seint í háttin því bróðir frænkunnar, frændinn, býr hé einnig með sinni konu og börnum og því þurfti að rifja upp gamla tíma og endurnýja kynnin. Mér var harðbannað að vera að borga fyrir gistingu í framtíðinni, sem er auðvita hið besta mál því eins og við töluðum um þá er svo mikilvægt að halda í vinskapinn þó hann hafi slitnað á tímabili. Við þekktumst sem krakkar og lékum okkur stundum saman í æsku en svo verða allir eitthvað svo bissí og fatta svo þegar um hægist að vinir og fjölskyldubönd fara að skipta meira máli.

Annars var hið besta veður hér í dag og við sátum úti í haustsólinni í hádegishléinu. Gott að finna smá hita á kinnarnar. Hef verið að horfa á gróðurinn og verð alltaf jafn hugfangin að rauða haustlitnum sem kemur á sum trén og runna. Þeir standa út eins og eldhnettir inn á milli gulu trjánna.

Á morgunn er síðasti dagurinn í þessari lotu og svo flýg ég heim.
Verð að segja að mig langar það nú ekkert sérstakelga mikið miðað við ástandið sem þar ríkir.
Krónan fór í 23 í dag svo ég yrði nú fljótlega auralaus ef ég myndi dvelja hér mikið lengur.
Svo allt hefur sína kosti og galla.

Kveð að sinni.

Er hér enn og aftur

2008-10-06T21:44:00.003Z

Er komin til Köben. Veit að það er óðs manns æði að hreyfa sig eins og ástandið er í dag á krónunni okkar. EN skólinn kallar og alltaf kemur eitthvað upp í hendurnar á manni þegar skóinn kreppir. Ég fer nefnilega beint norður þegar ég kem heim og held námskeið í Aðaldalnum.
Fyrir það fara nokkrir aurar í budduna sem ég get notað til að borga þessa ferð. Lífið er alltaf að koma mér á óvart.
Tók annars tvö próf í dag, söngpróf og skriflegt próf upp á 10 bls með 104 spurningum um söngtækni. Mér gekk nú barasta ágætlega að leysa úr öllu en það kemur í ljós þegar ég fer í matið á miðvikudaginn hvernig mér gekk í rauninni.
Ég lít ekki í búðargluggana á fallegu fötin í uppáhaldsbúðunum mínum. Vildi helst verða mér út um svona "blind folder" því freistingarnar eru margar og auðvita sér maður alltaf eitthvað æðislegt þegar enginn peningur er til fyrir því.
Keypti mér skemmtilega bók í fríhöfninni "Petite Anglaise" eftir Cathrine Sanderson og mæli með henni en hún fjallar um konu sem fer að blogga og afleiðingarnar sem það hefur í för með sér. Er nú bara búinn með 1/3 og les í lestum og strætóum því hún segir vel frá og bókin er líka vel þýdd af Höllu Sverrisdóttur. En það skiptir gífurlega miklu máli ef maður les ekki á frummálinu að bækurnar séu vel þýddar. Hef lagt frá mér þó nokkrar bækur því ég gat ekki lesið hroðvirknislegan textann sem þýðandinn setti frá sér.
Er út í sveit hjá góðri frænku í þetta sinn og drekk með þeim afmæliskaffi í fyrramálið því sú yngsta á heimilinu verður 8 ára á morgun og er búin að panta heitar bollur með súkkulaðiáleggi og smjöri.

Lífið er gott.
Kveð að sinni.

Síðan síðast hef ég......

2008-09-30T23:51:00.005Z

farið á bömmer yfir krónunni

velt því fyrir mér hvernig ég eigi að meika námsferðina til DK

lesið fyrir próf

farið á minningartónleika um Siggu og Ragnar H.

hlustað á börnin mín æfa sig

þvegið fjall af þvotti og brotið hann svo saman

horft á samanbrotinn þvottinn á borðstofuborðinu

talið og flokkað dósir, flöskur og gler

bakað möffins og súkkulaðiköku og fengið hjálp við það frá heimasætunni

velt því fyrir mér að taka slátur

horft á lánin mín hækka

verið hrikalega dugleg í ræktinni

reynt að fara snemma að sofa (NB, snemma er fyrir miðnætti)

eldað uppáhalds mat barnanna; mexíkóska kjúklingasúpu

fengið hrós

verið smá blá yfir lífinu

fundið fyrir einmannaleik

lesið ævisögu Erics Claptons

skráð mig inn á facebook og hitt þar gamla vini

hissað og jahérnast yfir gangi mála í þjóðfélaginu

fundist tvennan "lífið og tilveran" bara nokkuð góð miðað við allt og allt.

Tónlistardagurinn mikli

2008-09-27T16:08:00.005Z

Dísa og Þórunn sungu dúetta af mikilli snilld í Smiðjugötu 5.

Sonurinn var í bandinu sem var sett saman í tilefni dagsins.
Hann sat við snerilinn og burstaði í gríð og erg á meðan Halldór
spilaði á flygilinn og Valdi á bassann sem stóð á símaskrá
heimilisins því þetta var lánsbassi sem passaði ekki þeim
nánast 2ur metrum sem drengurinn fékk í vöggugjöf.
Aftast sat félagi þeirra og bankaði á bak á strengjalausum gítar.

Trommukrakkarinr hans Önna mynduðu "drumm line"
og börðu húðir í Hömrum. Daði Már er í miðjunni.

Barna og stúlknakórinn söng við opnun á sögusýningu í tónlistarskólanum

og héldu þaðan upp á sjúkrahús þar sem þessi mynd er tekin.

Dagurinn var yndislegur. Allir svo glaðir og fólk tók svo mikinn þátt þrátt fyrir leiðindaveður.

Heimilistónarnir voru vel sóttir og á sum heimili komu allt upp undir 40 manns.

Það var mál manna að þetta ætti að gera að árlegum viðburði.

Það finnst mér góð hugmynd.

Útkoman úr raunum mínum í síðustu viku.

2008-09-22T22:20:00.004Z

Niðurstaða:
Þú ert ekki haldin neinum alvarlegum sjúkdómi.
Ert bara með svona voðalega viðkvæmann ristil.
Meltingartruflanir köllum við þetta.
Sá samt roða í vélindanu, sem gæti orsakað bakflæði.
Ávísaði á þig töflum.
Haltu svo bara áfram að borða það sem þú þolir.
Þú verður eiginlega bara að finna út úr því sjálf.
Það er nefnilega þannig að læknavísindin eiga
ekki mikil svör þegar kemur að ristlinum.

Og ég yppi öxlum og hugsa; já okei ekki með neinn alvarlegan sjúkdóm, en eitthvað er ekki alveg í lagi og nú hefst leiðangurinn mikli hjá mér að finna það út. Og af því að ég hef svo óskaplega mikinn tíma þá verð ég fljót að finna það út, eða þannig.
Komst líka að því að það kostar 21.000 kr. að fara í maga og ristilspeglun. Jebbs.
Og 10.000 að fara í tölvusneiðmyndatöku. Jebbs, jebbs.
Og lyfin við bakflæðinu kosta mig um 5000 kall.

Drottinn minn sæll og glaður hvað það er nú yndislegt að vera til í dag.

Tónlistardagurinn mikli

2008-09-20T10:27:00.003Z

Í dag er haldið upp á 60 ára afmæli Tónlistarskóla Ísafjarðar.
Í dag mun tónlistin óma um allan bæ frá hádegi og langt fram á kvöld.
Dagskráin er fjölbreytt og munu nokkur heimili bjóða upp á heimilsitóna.
Ef þú sérð flagg og blöðrur fyrir utan hús máttu ganga í bæinn og hlýða á
tónlistaratriði og þyggja veitingar.
Sérstök "Music Aid" hljómsveit mun fara um bæinn á þar til gerðum vagni og
þeyta lúðra.
Í kvöld klukkan 8 verða tónleikar á Silfurtorgi sem enda á að allir bæjarbúar taka undir
í einkennislagi dagsin, ABBA laginu "Thank you for the music" sem Ólína Þorvarðardóttir
þýddi svo snilldarlega.
Flugeldasýning og Fjallabræður slá svo botninn í herlegheitin og er það svo ósk okkar að allir
njóti þess sem boðið er upp á.

Ég er að fara að gera mig klára því kórarnir mínir ætla að gleðja þá sem eru á sjúkrahúsinu.
Og af því það viðrar ágætlega geri ég ráð fyrir að við stoppum á götuhorni og hefjum upp raust
okkar fyrir bæjarbúa.

Hafið það gott í dag og njótið lífsins.

Svona fór um sjóferð þá

2008-09-16T23:10:00.004Z

Auðvita tókst mér að fara erfiðu leiðina gegnum þetta ristildæmi.
Loftið sem blásið er inn í þarmana á meðan á speglun stendur fann sér ekki
útgönguleið að sjálfsdáðum, þrátt fyrir einlæg hvattningarorð læknisins.
Því fór sem fór að í miðjum kennslutíma seinna um daginn,
gat ég ekki hreyft mig fyrir sársauka
þar sem loftið þrýsti sér upp undir rifbein og aftur í bak.
Ég meina, ég kann alveg að prumpa, en einhvernveginn vafðist það fyrir
þörmunum mínum að fara hinu einu sönnu leið.
Ég var því með miklum erfiðismunum sett á börur og flutt í sjúkrabíl aftur á spítalann.
Þar tók við sársaukafull myndataka svo tárin tóku að streyma niður kinnarnar.
Ósköp var ég vesældarleg þá.
Lögð svo inn og í mig dælt svona lyfi sem hjálpar manni að prumpa
og einnig fékk ég hrikalega sterkt deyfilyf sem gerði mig vel hífaða.
Það fer ekki fleiri sögum af þessu fyrr en undir kvöldmat að allt fer af stað
og aftansöngur mikill hófst í stofu 8.
Þá var minni létt.
Fékk að borða klukkan 9 og þá hafði ég ekki borðað neitt í 3 heila sólarhringa nema tæran vökva.
Geri aðrir betur.
Líður bara vel í dag og nokkuð hress.
Fer í meiri rannsókn á morgun en sú inniheldur enga loftfimleika.
Annars hefði ég neitað staðfastlega og afþakkað frekari rannsóknir.

Legg ekki meira á ykkur.

Nauðsynlegt en grábölvað

2008-09-14T11:00:00.004Z

Fyrir speglun er nauðsynlegt að hreinsa ristilinn rækilega af öllum úrgangi, svo rannsóknin og sýnatökur gangi eðlilega fyrir sig. Illa framkvæmd úthreinsun getur komið í veg fyrir að hægt sé að framkvæma speglunina.
Undirbúiningur tekur 2 daga.

1. dagur (laugardagur): AÐEINS MÁ NEYTA FLJÓTANDI, TÆRS FÆÐIS!

Tær angnarlaus súpa, fitulítið soð af súputeningum og agnarlaus ávaxta- og saftsúpur.
Allir gosdrykkir orkudrykkir
Te og kaffi með sykri eða hunangi (án mjólkur!)
Frostpinnar án súkkulaðihjúps

EKKI MÁ BORÐA NEINAR MJÓLKURVÖRUR

2. dagur (sunnudagur) AÐEINS MÁ NEYTA FLJÓTANDI, TÆRS FÆÐIS!

Kl. 8 um morgunin átt þú að drekka minnst 1 glas af tærum vökva og gjarnan fleiri.
Þá er flöskunni af Phosphoral (45ml) blandað út í glas af köldu vatni og drukkið.
Þar á eftir átt þú að drekka minnst eitt glas af köldu vatni eða safa, helst fleiri.
Þú mátt búast við að hægðarlosun byrji 1/2 klst - 6 klst eftir að drykkja hefst.
Notaðu blautþurrkur frekar en venjulegan salernispappír, til að koma í veg fyrir særindi.
Mikilvægt er að drekka a.m.k. 1 lítra af vökva fram eftir degi og helst meira.
Um kl. 19.00 er síðari Phosphoral flaskan blönduð á sama hátt og um morgunin og drukkin.
Fram eftir kvöldi og að morgni speglunardags er nauðsynlegt að drekka vel af tærum vökva.
Ágætt er að nota bragðgóðan brjóstsykur, eða ópal í hófi, á meðan úthreinsun stendur.

2008-09-12T10:05:00.001Z

ég heyri ekki betur en að sjálfur útvarpsstjórinn sé að lesa veðurfréttirnar.........

klafi vanans

2008-09-11T20:55:00.004Z

Hvernig í veröldinni stendur á því að ég sef alltaf örðu megin í rúminu mínu?
Afhverju sef ég ekki í miðjunni og nýti allt plássið?
Ég þarf ekki að tak tillit til neins heldur er svo pikkföst í gömlum vana að mér finnst hreinlega óþægilegt að nýta allt plássið.
Galið finnst ykkur ekki?

2008-09-10T11:32:00.004Z

Eins og kemur fram í kommentum í blogginu á undan

er kellingin orðin einu ári eldri í dag en í gær.

Myndin er tekin þegar afmælisbarnið afrekaði Laugarvegsgöngu í sumar.

Fyrir parísardömuna.

2008-09-07T19:58:00.006Z

Pizzusósa.

1 matskeið tómat púrré
1dl tómatsósa
1 matskeið hunang
2 hvítlauksgeirar, pressaðir
2 kúfaðar teskeiðar af basil og oreganó
og eða pizzukrydd

öllu blandað saman og sett á pizzubotninn, svo má setja meira krydd, allt eftir smekk hvers og eins.

Verði þér/ykkur að góðu.

Viðgerð

2008-09-03T09:41:00.004Z

Það gengur bara vel að gera við.
Fer 3svar í viku.
Er enn samt alveg ógurlega þreytt.
Þrekið kaupir maður víst ekki á haustútsölum.
Það næst besta er svo að standa undir sturtunni og láta vatnið fossa yfir sig.
Eitthvað svo hressandi.
Það besta er að hafa útsýni yfir bæinn sinn á meðan viðgerð fer fram
og horfa á lognið á Pollinum.
Það jafnast ekkert á við það.

Hamagangur

2008-08-29T10:19:00.003Z

Þar sem ég stóð inn á baði í morgun að setja í þurrkarann heyri ég þennan gríðalega hávaða.

Stekk fram á gang og sé að ekki bara hefur svalahurðin fokið upp heldur að grillið er komið á hliðina og hefur feykst með gaskútinn í eftirdragi eftir endilöngum svölunum.Og einhvernvegin hafði slangan í gaskútnum farið undir hurðina svo ég þurfti að toga allt heila klabbið til baka til að geta lokað hurðinni. Það er nefnilega þannig að svalirnar mínar eru mjóar en svalahurðin breið og dralsið kemst ekki framhjá henni þegar hún er galopin.

Ég var nýkomin úr sturtu svo ég fékk þennan fína hárblástur á meðan ég baksaði við að koma grillinu á góðan stað án þess að slíta slönguna frá. Og svo ætlaði ég aldrei að geta lokað hurðinni því vindurinn stóð beint upp á hana og hún er frekar þung.

Annars er framundan helgi sem byrjar með singalong ABBA sýningu sem við mæðgur ætlum á í kvöld. Á morgun er tónlistarskólinn í Bolungarvík settur og ég búin að láta plata mig í eitthvað söngdæmi.

Er svo enn að furða mig á þessu bruðli sem viðgengst hjá ráðamönnum þjóðarinnar.

Staðreynd

2008-08-28T18:49:00.002Z

Hah...........ferðir menntamálaráðherra kostuðu meira en árslaun tónlistarkennarans.

Lífið............

Haustdagarnir

2008-08-26T22:50:00.004Z

Viðburðaríkur dagur er á enda.
Fyrsti skóladagur grunnskólabarnanna.
Hann var fínn sagði Hlynur Ingi með mikilli áherzlu
og mér líst ljómandi vel á nýja kennarann minn.
Og svo brosti hann og það skein í stóra skarðið
í efrigómi þar sem vantar tvær framtennur.

Dagurinn minn var fullur af skipulagi og fundum
tölvupóstum og samtölum.
Spennandi verkefni framundan því
Tónlistarskóli Ísafjarðar fagnar
60 ára afmæli sínu um þessar mundir.
Veturinn leggst því ágætlega í mig
þó ég sé enn á ný orðin ein.
Það er vont en það venst.

samtal

2008-08-23T10:48:00.003Z

Brynja Sólrún var að horfa á mynd í tölvunni á leiðinni suður í gær. Svo er hún að skoða hulstrið og sér merki sem hún spyr bróður sinn hvað þýði.

Daði ( 18 ára);þetta þýðir að það má ekki skrifa diskinn

Brynja (11 ára); ha skrifa?

Daði; já afrita hann

Brynja; hvað meinarðu?

Daði; (orðinn dáldið pirraður) já þú veist "kópera" hann.

Brynja; já svoleiðis

Daði; (hneykslaður)bíddu, þarf ég að tala ensku við þig svo þú skiljir mig.

Það er gott og stundum árangursríkt að láta sig langa

2008-08-21T21:27:00.005Z

Það hefur verið á dagskrá hjá mér síðan í vetur að skipta um bíl. Og ég hef haft ákveðna týpu í huga sem hentar vel aðstæðum hér fyrir vestan. Og alltaf þegar ég hef séð svoleiðis bíl á götum borga og bæja hef ég hugsað með mér að einn dag muni ég keyra á slíkum bíl.

Ég hef eytt fleiri krónum í viðgerðir á bláu þrumunni en ég kæri mig um og buddan þolir.

Þegar ég heyrði svo óhljóðin í henni sl. föstudag þegar ég var í þann mund að leggja af stað vestur leist mér ekki á blikuna. Ég brunaði á verkstæðið hjá pusjó umboðinu og lét líta á gripinn og gekk 35 kr. fátækari frá verkstæðinu eigandi eitt stykki viftu sem var valdur af óhljóðunum.
Ég fékk grænt ljós á vesturferð en ráðleggingar um að fara með gripinn á verkstæði strax á mánudagsmorgni því í ljós kom að margt annað en blessuð viftan var að gefa sig.

Á mánudagsmorgni fer ég niður í Bílatanga og rek raunir mínar og fæ í kjölfarið tíma seinna í vikunni. Þegar ég geng út í bíl aftur lít ég út á söluplanið hjá verkstæðinu, en þeir eru m.a. með umboð fyrir Toyotu, og stendur þá ekki þessi fagurblái bíll beint fyrir framan mig. Ég geng að honum til að skoða og varð strax ofur hrifin. Þarna var kominn bíllinn sem ég hafði látið mig dreyma um , á verði sem ég réði við. Fjórhjóladrifinn lítill jeppi, Toyota RAV4 og meira að segja með krók.
Og þar sem hlutirnir gerast hratt á eyrinni þá fékk ég hann afhentan í gær þegar minn fór í söluskoðun og svo gekk ég frá kaupum í dag.
Þeir tóku bláu þrumuna upp í í því ástandi sem hún var í en viðgerðarkostnaður hljóðaði upp á 18 fimmþúsundkalla svo ég er laus allra mála og get núna um frjálst höfuð strokið og keyrt óhrædd um Óshlíðina 2svar í viku í vetur þegar ég fer að kenna.
Ég brosi breitt þessa dagana.

Ekki dauð enn

2008-08-18T18:07:00.003Z

Jæja ætli sé ekki best að henda hér inn einhverju.

Er sem sagt komin heim úr fríi sem var alveg hreint ágætt bara.
Alltaf gott að koma heim, sérlega ef útlegðin hefur varið í 4 vikur eða svo.
Var farin að sakna míns eigins rúms m.a.
Og krakkana.
Mikið, mikið.

Framundan er skipulag og eru komin nokkur drög að vetrinum.
Fjárfesti í ansi hreint ágætu dagatali sem hengt er upp á vegg.
Með því fylgu allra handa límmiðar, sem höfða til yngsta fólksins á heimilinu.
Það er svona tilraun til að halda öllu til haga.
Einnig til að gera alla fjölskyldumeðlimi virka og meðvitaða.
Nú verða 3 börn á mínu heimili í vetur.
Rokkarinn er kominn.
Verður í MÍ.

Mamman glöð.
Rosalega meira að segja.

Og hann sýndi snilldartakta við eldavélina í gær.
Bauð upp á saltfiskrétt með séríósi !!! ættaðan frá Mýrargötunni.

Í hann þarf:

Olíu
grænan og svartan pipar
saltfisk eins og þurfa þykir miðað við fjölda matargesta
1 pela af rjóma
hálfan gráðost

Og svona gerum við:

Setjum olíu á pönnu og fiskinn líka.
Hellum rjóma út í og brytjum niður gráðostinn.
Piprað og látið malla.

Kartöflur eru soðnar í potti og sallat búið til úr því sem er í ískápnum.
Seríós er sett í skál og því síðan stráð yfir fiskinn þegar hann er kominn upp á diskinn.

Borðað með opnum huga og bragðið kemur á óvart.

þrömur, eldengar og regning

2008-08-04T21:25:00.004Z

Komin út til köben.

Væri til í að vera með svona glas í hendi.

En......

Neibb.......það rignir og rignir

og þrumur og eldingar fyrir utan gluggann

sé fyrir mér að gerast alvöru túristi,vopnuð regnhlíf

regnslá og götu korti.

Við erum nebblega að tala um rigningu næstu tvær vikurnar.

Og þetta er fríið mittt.

Læt slag standa

2008-08-01T11:22:00.003Z

Vinkonur eru eitt af því besta sem maður hefur.
Maður getur hlegið með þeim, grátið með þeim og hellt úr hólfinu sínu þegar það er orðið yfir fullt. Og þar sem ég var að rekja raunir mínar í gær fyrir henni bestu minni henni Gróu þá spyr hún mig hvort ég sé heima í Skipasundinu.
Já ég er hér að láta mér leiðast og vorkenna sjálfir mér.
Ok ég kem segir hún.
Nokkru seinna bankar hún með látum, kemur inn og réttir mér stórann kassa.
Hérna, segir hún, taktu þetta.
Ég horfi stórum augum á hana og spyr hvað þetta sé.
Þetta er allsherjar hreinsi og uppbyggingarkúr, prufaðu þetta.
Í kassanum voru 3 stórir brúsar af Aloa Vera safa, stór dunkur af dufti og tvö glös með töflum í.
Meðfylgjandi er bæklingur og bók og skýrar leiðbeiningar og reitir til að fylla út.
Sem sagt, ég er komin á 9 daga kúr frá Live.

Ástandið getur ekki versnað hugaði ég og þar með er fyrsti dagurinn hjá mér í þessum kúr hafinn.

Æi hvað þetta er þreytandi

2008-07-31T13:46:00.005Z

Nú er Köben á næsta leiti og krónan hækkar stöðugt.
Þegar ég byrjaði í náminu úti var DK 10,0 fyrir einu og hálfi ári.
Þegar ég var úti í mai sl. hækkaði hún úr 14,0 í 16,0. á einni viku.
Þetta þýðir auðvita að skólagjöldin, húsnæðið, og maturinn hefur hækkað og buddan grætur.
Við eigum þess þó kost að greiða skólagjöldin í evrum en það er lítið hagstæðara,
allavega eins og staðan er núna.

Búin að njóta sólardaga í góðra vina og vinkvennahóp en mr. Mallakútur er ekki til friðs.
Eiginlega til mikilla ama.
Ákvað í gær að halda matardagbók og henda henni svo í doksa í von um svör.
Ég meina það er ekki eðlilegt að kona sem er 59 kíló sé með maga eins og hún sé gengin 6 mánuði á leið.
Því ég er EKKI ÓFRÍSK.
Alltaf eins og útblásin blaðra með vindverki og óhljóð.

Ekki lekkert, ha........

Geng í jogging og víðum kjólum því ég get ekki hneppt að mér buxunum lengur.
Og er þá ekki tilvalið að lesa bók sem heitir The food of love eftir Anthony Capella.
Þetta er skáldsaga þar sem aðalsögusviðið er Róm og ítölsk matargerð og hefðir eru fléttaðar inn í söguþráðinn. Aðalsögupersónan vinnur á einum þekktasta veitingastað borgarinnar.
Írónían er auðvita að ég get ekki með nokkru móti borðað ítalaskan mat því ég hef ofnæmi fyrir öllu sem í honum er.
En sagan er dásamleg og lýsingarnar á því hvernig á að sjóða pasta t.d. eru dýrlegar.

Súru og sætu kökurnar

2008-07-24T12:09:00.004Z

Búin að framkvæma lið eitt og tvö.
Er á milli liða.
Enn óvíst með ættarmótið, er í vinnslu.

Fór annars til meltingarsérfræðings í gær.
Það bættist nýtt á listann yfir það sem ég á að taka út úr fæðunni; ávaxtasykur.
Hann ku gerjast og mynda þaninn kvið sem hefur hrjáð mig síðan í vor.
Við gefum okkur einn mánuð í að kanna það og ef það er ekki orsökin þá
er ég með lyfseðil upp á sýklalyf því þá er helst að bakteríur hafi tekið sér bólfestu
í mjógörnunum.
Blóðprufa var tekin og hveitið og skjaldkirtillinn athugaður.
Bíð eftir niðurstöðum.

Lisitnn minn lítur því svona út:

Engar mjólkurvörur né neina fæðu sem innihalda mjólkurvörur.
Ekki ger (t.d. brauð, pakkamatur, súpu/kryddteningar, niðursuðuvara)
Ekki hvítt hveiti ( t.d. pasta, brauð,kökur,kruðerí og pizzza)
Ekki svínakjöt
Ekki nautakjöt
Ekki ávaxtasykur, ss ENGA ÁVEXTI.

Mig langaði nú bara að leggjast í gólfið og grenja í gær.
Í ávöxtum og sérstaklega ferskum ananas er melitingarenzím og það eru þau sem mig skortir,
já nú er bleik brugðið.

Sem betur fer á ég góða vini sem hringja í mig og lesa fyrir mig mataruppskriftir áður en þeir bjóða mér í mat.
Það gerir þetta allt aðeins bærilegra.

ps. hvet ykkur til að LESA innhaldslýsingar á matvörum.
MJÖÖÖÖÖG fróðlegt.

Bensínverðið kálaði sumarfríinu - eða er mér alveg sama???

2008-07-17T00:24:00.004Z

Sko, er í smá vandræðum.
Og eiginlega allt út af því að það er allt of margt í boði í einu.
Maður vill jú geta gert allt sjáiði.
Altsvo ef sá sem nennir að lesa um þessi vandræði og nota bene getur komið með góð ráð þá stend ég ævinlegri þakkarskuld og skal birtast syngjandi sæl og glöð á tröppum viðkomandi sem verðlaun fyrir að hjálpa mér úr vandræðunum.
Nú svona er staðan

1. Um næstu helgi býðst mér að fara á ættarmót norður í land með Birgi. Við getum hist í Búðardal, ég skilið bílinn minn þar eftir og haldið áfram með honum og NB nú höfum við ekki hist í 2 vikur.

2. Þar sem ég lofaði í vetur að leigja íbúðina mína frá 21 - 24 júlí þá þarf ég að far heim aftur og gera klárt fyrir það.

Hér er komin fyrsta bílferð fram og til baka á tanki sem kostar 8.000 kalla að fylla. Geri ráð fyrir að fara með einn tank fyrir þessa ferð.

3. Ég fékk, jíbbí jæ jei, tíma hjá meltingarsérfræðingi þann 23. júlí. (var ekki að kaupa þetta með þann sem gaf mér tíma 30. sept)

4. Ættarmót hjá minni fjölskyldu helgina 24 - 26 júlí og það er ætlast jú til að maður mæti.

Hér er þá komin ferð númer tvö fram og til baka en í þetta sinn alla leið til Reykjavíkur. Bíllinn minn fer með rúman hálfan tank suður ca. 5000 kall og svo annað eins til baka. 10.000 kall kominn þá í þessa ferð.

5. Þarf svo að vera komin suður fyrir 4. ágúst því þá förum við Birgir saman til Köben.
kem til landsins 14. og þá er spurning hvað skal gera far heim eða vera því

6. þann 25. ágúst erum við boðin í brúðkaup fyrir sunnan.

Ef ég fer heim þá er komin 10.000 kall í bensíns og svo aftur 5000 kall til að komast suður í bryllup.

Samanlagt er þetta 28.000 - 32.000 bara í bensín. Þá er ófrátalið nesti og svoleiðis sem maður verður að hafa í 5 tíma akstri.

Ef ég sleppi því að koma vestur til að fara á ættarmótið þá er ég búin að spara 10. þús kallinn þar í bensín.
En ef ég kem bara ekkert vestur fyrr en öllu þessu er lokið sem er að gerast fyrir sunnan þá er ég í 3 vikur í burtu og skil 18 ára gamlann ungling eftir einann heima. Og ekki finnst mér það nú fýsilegur kostur frekar en ostur.
Unglinginn tek ég ekki með mér því hann réð sig í vinnu og þarf að standa sína plikt þar.

Já hér sannast að sá á kvölina sem á völina eða ef ég ætti nóg af seðlum þá væri þetta engin spurning - ég fengi mér bara einkaflugvél og sætann flugmann.

í langadal

2008-07-11T15:49:00.003Z

Framundan er bústaðaferð

Gott að rífa sig upp úr pestarbælinu.

Búin að baka rosa mikið af muffins.

Líka búin að búa til kjúklingasallat til að borða í kvöld.

Og baka brauð.

Og fara í vínbúðina.

Bara eftir að henda lörfum í tösku og ekki gleyma sundfötunum.

Óska ykkur góðrar helgar kæru vinir.

assgotans vesen

2008-07-10T13:40:00.008Z

Hversu fúlt er það að vera veik , með hausverk og endalaust kvef í miðju sumarfríi?????

Myndirnar hér fyrir neðan eru frá Laugavegsgöngunni.
Orka ekki meir.

Skot

2008-07-04T08:42:00.002Z

Fékk á mig 6 skot úr byssu frá frökan Baun.
Úr hverju skoti puðrast út eitt lýsingarorð.
Hvert þeirra eiga að lýsa lífi mínu í dag.

Gleði - von - barátta - ást - dásamlegar bækur - gott kaffi

Ég skýt úr framhlaðningi mínum á Ameríkufarann - blómakonuna á Höfn - meðlamanninn
og Sópranínu.

dagur eitt - laugavegurinn

2008-07-01T23:05:00.008Z

Í landmannalaugum í upphafi göngunnar

Laugarvegsgangan var auðvita órtúlegt afrek.

Við gengum 70 km, en hin venjulega leið er um 60 km, og kom það til vegna þess að við höfðum svo fróðann fararstjóra sem hafði gaman af að fara með okkur svona "smá" útúrdúra. En þessir útúrdúrar voru það sem gerðu ferðina stórskemmtilega.

Á fyrsta degi er gengið um Laugahraun að Brennisteinsöldu og eru litirnir líkt og sést á þessari mynd allt um kring ásamt rjúkandi hverum.

Töluverður snjór var á leiðinni og frekar þungt að ganga því snjórinn var það mjúkur að hann gaf vel eftir. Það reyndi því dálítið á mjaðmirnar.

En það er alveg nauðsynlegt að hafa göngustafi á svona göngu því þeir létta manni vinnuna við að pækla svona í snjónum.

Fyrstu nóttina sváfum við í Höskuldsskála í Hrafntinnuskeri. Mikið ofboðslega var gott að hvíla lúin bein þó lítið hafi farið fyrir svefni þar sem ég svaf í efri koju og hrotkór allt í kringum mig.

Eitt er nauðsynlegt í svona ferð og það er að taka með sér koddann sinn. Minn varð eftir heima og það var eiginleg alveg ferlegt. Annað er að hafa lopapeysuna til að skella sér í á kvöldin svo hægt sé að fara úr flísinu og viðra hana.

Og kakó og koníak.....og mikið af því.

laugavegurinn

2008-06-25T08:12:00.001Z

Er farin á fjöll.
Þar til á sunnudag;
hafið það allra best kæru vinir.

Lífið er gott.

Dýrtíðin heldur áfram

2008-06-21T19:55:00.012Z

"Þetta er skemmtilegasti dagur ævi minnar" sagði Snáðinn minn í dag.

Myndirnar segja allt sem segja þarf.

Vatnið látið renna í sundlaugina

Bóndarósin í fullum blóma

Það er gaman að busla og leika sér með vatn

og sundlaugin orðin gott sem full

Sumir grilla og aðrir sötra bjór

Maður verður voða svangur að busla svona í sundlauginni

mmmmm......grilluð pylsa..

Sól, sól skín á mig....

Í sundlaugina fóru svo margir lítrar af vatni að það er eiginlega glæpur.

En það var gaman að tæma hana og fara í vatnsslag.

Sullum bull...

vatninu var skvett úr fötum í nærliggjandi beð og fólk

tveir söngfuglar og annar með magakveisu

2008-06-20T00:21:00.004Z

Stundum gerst hlutir svona af tilviljun eða í gegnum maður þekkir mann sem þekkir mann.
Þannig rataði til mín aloa vera safi og annað græðandi í mínar hendur í dag.
Ætla að prufa að súpa 3svar á dag þennan vökva og sjá hvort minn magi hættir að haga sér eins og ég sé komin 5 mánuði á leið.
Ég meina...... það er þess virði.......ástandið getur ekki versnað.

Verð annars að segja ykkur frá fuglinum sem á heima í trénu hér í Skipasundinu. Þetta er svona söngfugl. Í gærkveldi söng hann stef sem byrjaði alltaf á hreinni 4und upp á við sem hann endurtók 2svar til 3svar sinnnum, söng svo litla 3 und niður og svo svona nokkra slaufur sem inni héldu stórar og litlar tvíundir. Svo kom þögn, já eiginlega í ígildi hálfnótuþagnar. Svo hófst stefið á ný.
Í kvöld syngur hann annað stef sem er sett saman úr tvíundar slaufum og endar alltaf á hreinni ferund upp á við. Þetta er alveg magnað að hlusta á. Vildi að ég væri með ipod græjuna mína og hljóðnemann sem hægt er að setja í samband við hann til að taka þetta upp.
Tónskáldið Oliver Messian gekk um skóga og hljóðritaði margvísleg fuglahljóð meðal annars og notaði þau sem grunn af tónverkum sínum. Hann hefði haft gaman af þessum íslenska söngfugli hér í garðinum.

Himinsins hryggjarsúla

2008-06-19T11:14:00.003Z

Skógarpúkar í sumarfríi

2008-06-16T12:20:00.016Z

Sumarfríið byrjaði á smá pikknikk í fjöruna í Holti.

Það var nú ekkert sérlega hlýtt en sólin skein og

krakkarnir óðu út í og bleyttu sig og þá var nú

heppilegt að mamma hafði kippt með sér handklæði

á síðustu stundu.

Hér sést gamla rafstöðin í Engidal.

Þetta bú var á sandkassalokinu á leikvellinum
sem er hjá rafstöðinni.

Bros

Daginn eftir keyrðum við til Akureyrar til að
hlýða á hana Hrund okkar syngja á Aim festival.
Hún sló auðvita í gegn og var hreint út sagt æðisleg.

Sætar systur

Það var bongóblíða á föstudeginum og tilvalið að fá sér

kaffisopa á bláu könnunni.

Brynja Sólrún , Nanna og Sigurbjörg gúffa í sig súkkalaðiköku.

sumar

Við fórum í Vaglaskóg og löbbuðum yfir þessa fallegu brú

en það eru um 100 ár síðan hún var reist.
Brynja Sólrún, Nanna og Hlynur Ingi "pósa"

fyrir myndasmiðinn.

Sæti bílstjórinn hann Birgir.

Og auðvita fær maður ís í sólinni.

Nanna og Brynja gæða sér á norðlenskum Brynju ís.

Í dag erum við í Aðaldalnum. Það er reyndar hífandi rok og kalt.

Keyrum sennilega í dag í áttina að borginnni.

Sólin fór víst þangað.

Tilraun til að spara

2008-06-11T23:08:00.003Z

Manni er ekki farið að lítast á blikuna með hvað allt er orðið dýrt.

Buddan kvartar sáran svo nú eru góð ráð dýr.

Tók mig því til um daginn og bakaði muffins í tilraun minni til að sporna við úgjöldum heimilisins.

Fann fína uppskrift af muffins sem ég hef svo líka aðlagað að mínum ofnæmis kroppi.

Ég var búin að hræra öllu saman og átti bara eftir að brytja súkkulaðið niður og henda út í deigið.

Þá vildi nú ekki betur til en trébrettið klofnaði undan átökunum eins og sést á meðfylgjandi mynd.

Er bara allt að fara fjandans til hugsaði ég.

Muffins kökurnar smökkuðust hinsvegar vel og hurfu upp í munn allra púkanna sem ganga hér inn og út þessa dagana.

Læt uppskriftina fylgja með, bæði þá venjulegu og svo þessa sem ég breytti og aðlagaði ef einhver vill vera heilsusamlegur og bæta meltinguna - heheh -

Muffins

50 gr brætt smjörlíki

100 gr sykur

1 egg

150 gr hveiti

1 dl mjólk

1 tsk vanilludropar

2 tsk lyftiduft

1 plata suðusúkkulaði brytjað smátt.

Öllu blandað saman.

Hitið ofninn í 175°C

Setjið deigið í muffinsform og bakið í 15 mín.

Uppskriftin gefur um 22 kökur.

Muffins fyrir ofnæmisgemlinga og aðra sem áhuga hafa.

50 gr. kókosolía -brædd

1 dl Agave síróp

1 egg

150 gr fínt spelt

1 dl sojamjólk eða rísmjólk

1 tsk vanilludropar

2 tsk lyftiduft

1 plata 70% súkkulaði brytjað í smátt

Setjið í muffinsform og bakið við 175°C í 15 mín, miðað við að ofinn sé heitur þegar kökurnar eru settar inn.

Sommertime and the livin is easy

2008-06-09T22:55:00.003Z

Okkar fyrsta sumarfrí saman hófst í dag.

Gerðum bara eiginlega ekki neitt.

Sem ég elska mest.

Þegar þarf ekki að gera neitt nema mann langi til þess.

Framundan er ferð norður á Akureyri á þessa hátíð.

Bendi auðvita áhugasömum á að söngdívan mín er þar að syngja.

Einnig er hægt að lesa gott viðtal við hana í helgarblaði DV.

Gönguferðin um Laugarveginn er borguð og frágengin svo það er ekki hægt að bera sig auma

og tala um aumar mjaðmir og verki í nára sökum grindargliðnunnar.

Nú verður tekið á því og ekki raus með það.

Birgir er búinn að lána mér myndavél og er meiningin að læra á hana

og koma myndum inn á vefinn og svo þetta bloggsvæði.

Það ætti nú ekki að vera erfitt að finna tíma til þess.

Ég er komin í sumarfrí - jíbbbbbíiíííííí.........

Daði Már 18 ára

2008-06-07T11:23:00.003Z

Afmæli þú átt í dag

út af því við syngjum lag.

Sama daginn sem er nú

sannarlega fæddist þú.

;:til hamingju með heilladaginn þinn

heillakallin minn;:

Allt þér gangi vel í vil

vertu áfram lengi til.

Allt þér gangi hér í hag

höldum upp á þennan dag.

;: til hamingju með heilladaginn þinn

heillakallinn minn;:

Ókeypis víma

2008-06-06T17:47:00.003Z

Held ég sé með bullandi fráhvarfseinkenni.

Hausinn fullur af drasli.

Sviminn að gera út af við mig.

Víííííí

Einkaflugvél óskast

2008-06-04T23:24:00.004Z

Ég lét loksins vera að því að panta mér tíma hjá meltingarsérfræðingi.

Og það mun vera kona í þetta sinn, alveg fullreynt með kallana.

Í bjartsýni minni datt mér í hug að ég gæti fengið tíma svona seint í sumar, ágúst jafnvel.

Já nei, 30. september er dagurinn!!!!

Og þetta þykir nú bara eðlilegt.

En ekki nóg með það, konan er bara með viðtalstíma á stofunni á þriðjudögum.

Ég vona að það verði flogið, var það eina sem mér datt í hug að segja við veslings símadömuna. Því ef ég kemst ekki þá hvenær kemst ég þá að??? á næsta ári???

Ja dúddi minn..................

2008-06-04T16:43:00.003Z

Fékk þessa mynd senda áðan af Rokkaranum mínum.

Sést hér glaður í Köben í gær á leið á Kiss tónleika.

Sms - ið sem ég fékk í gær hljómaði svona:

"Þetta var geeeeðveikt"!!!!!!!

Konan sem hélt hún væri komin í frí

2008-06-04T13:38:00.004Z

- kenndi þulur og fimmundasöng í morgun
- fyllti snúrur af þvotti
- útbjó hádegsmat fyrir börnin
- setti í uppþvottavél
- fer á fund kl. 14:15
- heldur þulu og fimmundasöngsæfing kl. 15.00
- vinnur kl. 15. 30 - ???í efnalauginni (afleysing svo brósi komist í sjúkraþjálfun)

afhverju kann ég ekki að segja NEI?????

2008-06-04T00:10:00.001Z

Mikið robboðslega er kósý að sitja hér á efri hæðinni og hlusta á regnið bylja á þakgluggunum.

komin í fríið

2008-06-03T20:18:00.003Z

Loksins loksins tókst mér að koma öllum nótunum fyrir í eitt flott nótnasafn í skólananum, keypti möppur, harða vasa, og sorteraði þannig að allt er núna klárt og komið á sinn stað. Alveg dásamleg tilfinning að opna skápana núna og horfa á.
Þetta leit ekki vel út þegar ég var búin að breiða úr mér í stofunni minni og nánast betrekkja hvert einasta borð með nótnablöðum og kennsluefni. En svo hakkaði ég mig í gegnum þetta smám saman og tókst í dag að ljúka þessu.

Við erum núna komin í frí ég, Brynja og Hlynur fram í ágúst og við tekur fótbolti og námskeið af ýmsu tagi ásamt ferðalögum og kósýheitum heima fyrir. Sumarleikirnir í garðinum eiga sér enn tilveruvist því börnin eru úti allan guðslangann daginn og gleðin náði hámarki þegarþau fengu ósk sína uppfyllta. Það var ákveðið á húsfundi að kaupa trampólín. Þau hafa því hoppað og skoppað villt og galið í allan dag.

Hlakka til sumarsins og tímans framundan. Eftir langann og erfiðan vetur er gott að geta verið á sínum eigin hraða í tilverunni og gert það sem mann langar þann daginn.

Plíííísss ekki vera komin með rugluna

2008-05-29T12:06:00.005Z

Ég sé ekki síðustu færslu og veit ekki afhverju, er samt búin að fá komment á hana.
Frekar undarlegt.
Ætla að prufa að birta þetta og sjá.

2008-05-27T22:31:00.005Z

Krakkarnir í kórunum rúlluðu upp þessum tónleikum.
Barnakórinn svo tandurhreinn og brosandi sæt í sumarlegum dressum.
Stúlknakórinn flutti A Friday Afternoon eftir Benjamin Britten - öll 12 lögin og stóðu sig svo flott að ég var ákaflega stolt af þeim. Mikið afrek af ekki eldri kór en þetta aðeins 2ja ára.

Eftir tónleikana fór fjölskyldan öll sömul heim á Engjaveginn þar sem pabbi bauð í ekta íslenska kjötsúpu. Og mikið rosalega smakkaðist hún vel. Alveg passlega söltuð, ekki brimsöltuð eins svo oft vill verða.

Annars fara fram miklar umræður hér um hvaða stefnu Rokkarinn minn ætlar að taka í lífinu eftir að hann hefur fundið út að bóklegt nám í MH er ekki alveg að henta honum.

Sá á kvölina sem á völina segi ég nú bara.

dittinn og dattinn

2008-05-24T11:49:00.005Z

Þegar ég vaknaði í morgun lá ég áfram í rúminu og las blöðin frá því í vikunni þar sem ekki hefur gefist tími til að fletta Mogganum vegna gríðarlegra anna. Finnst ég svosum ekki hafa misst af neinu stórkostlegu heldur komast að því að það er alveg hægt að vera án blaða og fjölmiðla í viku eða svo. Mér hefur alla tíð leiðst pólítísk karp sem má þó ekki skilja að ég hafi ekki skoðun á mönnum og málefnum. Verð að segja að ég er alltaf að sjá hvað hún Jóhanna Sigurðardóttir er flott. Ekkert pólitískt þref heldur talað um hlutina eins og þeir eru og gengið í málin. Sannarlega að hennar tími er komin.

Annars er þessi laugardagur kærkominn. Á frí í dag eftir laaaaanga og straaaaanga vinnutörn og
er svona að velta því fyrir mér hvað mig langi til að gera. Sumt þarf ég að gera því íbúðin er á öðrum endanum, en fyrir utan það þá væri ekki úr vegi að njóta veðurblíðunnar sem heilsar mér í dag. Byrjaði samt daginn á því að sletta rándýra kreminu mínu upp um alla veggi og innréttingar og alla leið út á gólf. Eitthvað var ég kærulaus í gær eftir sturtuna enda á ógnarharða að koma mér í múnderinguna fyrir skólaslit og útskriftartónleika, því ég hafði ekki skrúfað lokið nægilega vel á krukkuna og þegar ég greip hana í morgun þá hélt ég á lokinu og horfði svo á krukkuna taka loftfimleikaköst og endasendast svo á gólfið.

En ætli ég byrji ekki á því að viðra sængina mína og koddann út á svölum svo ég geti sofnað í kvöld í hreinu líni með vorlyktina í sænginni minni.

Eigið góðan dag kæru vinir.

Hvað er til ráða?

2008-05-23T08:28:00.003Z

Hvað gerir maður fyrir neglur sem klofna???

Eitthvað svona??

Er búin að taka Omega 3 í allan vetur (samkvæmt ráðleggingum fróðra kvenna)

og bera á þær naglaherðir.

En allt kemur fyrir ekki.

Er orðin dauðleið á því að hafa ljótar neglur og langar í mínar fínu aftur sem ég hafði hér í eina tíð.

Lumar einhver á góðum ráðum??